नवी दिल्ली - शेतकरी आंदोलासंबंधी सोशल मीडियावरून पोस्ट करताना टुलकिटचा (toolkit) वापर झाल्याप्रकरणी दिल्ली पोलिसांच्या सायबर सेलने तपास सुरू केला आहे. या प्रकरणी सायबर सेलने बंगळुरातील एका २१ वर्षीय पर्यावरणवादी कार्यकर्तीला अटक केली आहे. दिशा रवी असे अटक केलेल्या तरुणीचे नाव आहे. स्वीडनमधील पर्यावरण कार्यकर्ती ग्रेटा थुनबर्ग हिनेही टुलकिटचा वापर केला होता. त्यामुळे याची जगभर चर्चा झाली होती. तीला दिल्ली न्यायालयाने पाच दिवसाची पोलीस कोठडी सुनावली आहे.
ट्रॅक्टर रॅलीतील हिंसाचारानंतर चर्चेत आले टुलकिट
ट्रॅक्टर रॅलीतील हिंसाचारानंतर चर्चेत आले टुलकिट चर्चेत आले होते. शेतकरी आंदोलनाबाबत टुलकिट सोशल मीडियावरून पसरवल्याचा आरोप दिशा रवी हिच्यावर ठेवण्यात आला आहे. दिल्ली पोलिसांनी दिलेल्या माहितीनुसार, टुलकिट प्रकरणी दाखल झालेल्या गुन्ह्यात दिशा रवी ही एक प्रमुख आरोपी आहे. टुलकिट सोशल मीडियावरून पसरवण्याबरोबरच त्यात दुरुस्ती केल्याचे प्राथमिक तपासात पुढे आले आहे. सायबर पोलिसांचे विशेष पथक आरोपीची कोठडी मिळाल्यानंतर पुढील तपास करेल. सुत्रांकडून मिळालेल्या माहितीनुसार याप्रकरणी आणखी काही व्यक्तींना अटक होण्याची शक्यता वर्तवली जात आहे.
ग्रेटा थुनबर्गनेही केले होते टुलकिट पोस्ट
स्वीडनमधील १८ वर्षीय ग्रेटा थुनबर्ग हिने शेतकरी आंदोलनाला पाठिंबा देणार ट्विट केले होते. हे ट्विट करताना तिने टुलकिटचा वापर केला होता. मात्र, नंतर तिने हे टुलकिट डिलिट केले होते. मागील आठवड्यात दिल्ली पोलिसांनी या टुलकिटबाबतची माहिती गुगल कंपनीकडे मागितली होती. हे टुलकिट कोणी तयार केले, त्याची नोंदणी कुठली आहे. या संबंधीची माहिती कोठून प्रसिद्ध झाली अशा प्रश्नांची दिल्ली पोलीस उकल करत आहेत.
दोन ईमेल आयडी, इस्टाग्राम खाते, एका वेबसाईटचा युआरएलचा या टुलकिमध्ये सहभाग होता. याची माहिती पोलीस गुगलकडून मिळवत आहेत. पोलिसांनी या प्रकरणी अज्ञान व्यक्तीविरोधात गुन्हा दाखल केला आहे. खलिस्तानी चळवळीशी संबंधीत व्यक्तींनी हे टुलकिट तयार केल्याचेही बोलले जात आहे.
