कानपूर ( उत्तरप्रदेश ) : कानपूरमध्ये एक धक्कादायक घटना समोर आली आहे. बेकगंज पोलीस स्टेशन हद्दीतील राम जानकी मंदिर पाकिस्तानच्या एका नागरिकाने विकले. यानंतर, कंझर्वेटर ऑफ एनीमी प्रॉपर्टीच्या ( Conservator of Enemy Property ) कार्यालयाने, मंदिर आणि इतर दोन मालमत्तांना 'शत्रू मालमत्ता' म्हणून सूचीबद्ध करण्याची प्रक्रिया सुरू केली. याशिवाय खरेदीदार मुख्तार बाबा यांना नोटीस बजावण्यात आली आहे.
मिळालेल्या माहितीनुसार, कानपूरच्या बेकनगंज भागातील मालमत्ता 1982 मध्ये पाकिस्तानी नागरिक आबिद रहमानने कानपूरच्या मुख्तार बाबाला विकली होती. त्यावेळी मुख्तार बाबाचे मंदिर परिसरात सायकल दुरुस्तीचे दुकान होते. आबिद रहमान 1962 मध्ये पाकिस्तानात गेले, जिथे त्यांचे कुटुंब आधीच राहत होते. आबिद रहमान संपत्ती विकण्यासाठी काही काळात परत आला आणि त्याने मुख्तार बाबाला मालमत्ता विकली. मालमत्ता खरेदी केल्यानंतर मुख्तार बाबाने तेथे राहणाऱ्या १८ हिंदू कुटुंबांना जागेतून बेदखल केले आणि त्याजागेवर हॉटेल बांधले.
पाकिस्तानी नागरिकाने विकलेली जमीन अजूनही कानपूर महानगरपालिकेच्या रेकॉर्डमध्ये मंदिर म्हणून नोंदलेली आहे. गेल्या वर्षी शत्रू मालमत्ता संरक्षण संघर्ष समितीने तक्रार केल्यानंतर या प्रकरणाचा तपास सुरू झाला. तत्कालीन जिल्हाधिकाऱ्यांनी सह दंडाधिकार्‍यांना या प्रकरणाची चौकशी करण्यास सांगितले होते. हा अहवाल नंतर कस्टोडियन ऑफ एनीमी प्रॉपर्टीच्या कार्यालयात पाठवण्यात आला.
गार्डियन ऑफ एनीमी प्रॉपर्टीच्या कार्यालयाचे मुख्य पर्यवेक्षक आणि सल्लागार कर्नल संजय साहा यांनी सांगितले की, ज्या लोकांनी मंदिर विकत घेतले आहे आणि ते पाडले आहे त्यांच्यासह हॉटेल बिल्डर्सना नोटिसाही बजावल्या आहेत. या लोकांना उत्तर देण्यासाठी दोन आठवड्यांची मुदत देण्यात आली आहे. त्याचवेळी, मुख्तार बाबाचा मुलगा महमूद उमर याने सांगितले की, त्यांच्याकडे सर्व आवश्यक कागदपत्रे आहेत आणि लवकरच त्यांना विचारलेल्या प्रश्नाचे उत्तर देऊ.
