नवी दिल्ली: नुकत्याच झालेल्या विधानसभा निवडणुकीत पक्षाच्या दारुण पराभवानंतर काँग्रेस अध्यक्षा सोनिया गांधी यांनी उत्तर प्रदेश, उत्तराखंड, पंजाब, गोवा आणि मणिपूर या राज्यांच्या अध्यक्षांना राजीनामा देण्यास सांगितले आहे. पक्षाचे मुख्य प्रवक्ते रणदीप सुरजेवाला यांनी मंगळवारी ही माहिती दिली. त्यांनी ट्विट केले की, 'काँग्रेस अध्यक्षा सोनिया गांधी यांनी उत्तर प्रदेश, उत्तराखंड, पंजाब, गोवा आणि मणिपूरच्या राज्याच्या प्रदेश अध्यक्षांना राजीनामा देण्यास सांगितले आहे. जेणेकरून राज्य काँग्रेस समित्यांची पुनर्रचना करता येईल.'
रविवारी झालेल्या काँग्रेस कार्यकारिणीच्या बैठकीत काँग्रेस नेत्यांनी सोनिया गांधी यांच्या नेतृत्वावर विश्वास व्यक्त करत संघटनात्मक निवडणुका पूर्ण होईपर्यंत त्यांनी या पदावर कायम राहावे आणि पक्षाला मजबूत करण्यासाठी आवश्यक पावले उचलावीत, असे सांगितले होते.
काँग्रेस सरचिटणीस प्रियंका गांधी यांनी मंगळवारी निवडणूक प्रचाराशी संबंधित वरिष्ठ नेत्यांसोबत उत्तर प्रदेश विधानसभा निवडणुकीत पक्षाच्या निराशाजनक कामगिरीचा आढावा घेतला. सूत्रांनी दिलेल्या माहितीनुसार, या बैठकीत विधानसभा निवडणुकीतील उणिवा आणि पुढील रणनीती यावर चर्चा झाली.
प्रियंका गांधी यांच्या अध्यक्षतेखाली झालेल्या या बैठकीत प्रदेश काँग्रेस कमिटीचे अध्यक्ष अजय कुमार लल्लू, ज्येष्ठ नेते प्रमोद तिवारी, राजीव शुक्ला, सलमान खुर्शीद, आराधना मिश्रा आणि इतर अनेक नेते उपस्थित होते. उत्तर प्रदेश विधानसभा निवडणुकीत यावेळी काँग्रेसच्या अवघ्या दोन जागांवर घसरण झाली आहे. अनेक ज्येष्ठ नेत्यांनाही दारूण पराभवाला सामोरे जावे लागले आहे.
