Rule Change From 1st September 2023 : नवी दिल्ली : सप्टेंबर महिन्याची सुरुवातही अनेक बदलांनं होणार आहे. ज्याचा थेट परिणाम सर्वसामान्यांवर होणार आहे. या बदलांचा स्वयंपाकघरापासून ते शेअर बाजार, गुंतवणुकीवर परिणाम होईल. त्याचबरोबर पगारदार वर्गातील लोकांनाही बदलांना सामोरं जावं लागणार आहे. त्यांच्या उत्पन्नात वाढ होणार आहे. 1 सप्टेंबरपासून काय बदल होणार आहेत जाणून घेऊया.
LPG गॅस सिलेंडरच्या किमतीत बदल : पहिल्या बदलामध्ये एलपीजी गॅस सिलेंडरच्या किंमतींचा समावेश आहे. गॅस कंपन्या दर महिन्याच्या पहिल्या तारखेला दर ठरवतात. अशा परिस्थितीत एलपीजी गॅसच्या किमतीत तफावत बघायला मिळणार आहे. त्याचबरोबर केंद्र सरकारनं घरगुती गॅसच्या किमती 200 रुपयांनी कमी केल्या आहेत. आता गॅस कंपन्यांच्या भूमिकेची प्रतीक्षा आहे, कारण या बदलाचा थेट परिणाम देशातील जनतेवर होणार आहे. (Domestic gas rates reduced)
CNG-PNG गॅसच्या किमतींमध्ये बदल : दुसऱ्या बदलामध्ये CNG-PNG गॅसच्या किमतींचा समावेश आहे. महिन्याच्या पहिल्या दिवशी CNG-PNG च्या किमती ठरवल्या जातात. 1 सप्टेंबर 2023 पासून त्यांच्या किमतीत बदल दिसून येणार आहे. त्याचा परिणाम स्वयंपाकघरापासून ते प्रवासापर्यंत सर्वच गोष्टींवर होणार आहे. (Changes in CNG rates)
IPO चे नवीन नियम लागू : तिसर्‍या बदलाबद्दल बोलायचं तर IPO बाबत SEBI च्या निर्णयाशी संबंधित आहे. सेबीनं आयपीओ बंद झाल्यानंतर कंपनीचे शेअर्स शेअर बाजारात सूचीबद्ध करण्याची अंतिम मुदत बदलली आहे. मिळालेल्या माहितीनुसार, सेबीनं ही मुदत तीन दिवसांपर्यंत कमी केली आहे. यासंबंधित अधिसूचना जारी करताना सेबीनं सांगितलं की, नवीन नियम 1 सप्टेंबर 2023 रोजी किंवा त्यानंतर येणाऱ्या सर्व IPO साठी लागू होईल. SEBI नं 28 जून रोजी झालेल्या बैठकीत हा निर्णय घेतला होता. (New rules of IPOs apply)
क्रेडिट कार्डच्या नियमातही बदल : चौथ्या बदलामध्ये क्रेडिट कार्डशी संबंधित नियमांचा समावेश आहे. खासगी क्षेत्रातील ॲक्सिस बँकेच्या मॅग्नम क्रेडिट कार्डच्या ग्राहकांसाठी 1 सप्टेंबर 2023 पासून बदल होणार आहेत. सप्टेंबरच्या पहिल्या दिवसापासून नवीन नियम लागू होतील. बँकेनं दिलेल्या माहितीनुसार, काही व्यवहारांवर विशेष सवलतीचा लाभ मिळणार नाही. त्याचवेळी, 1 सप्टेंबर 2023 पासून, कार्डधारकांना वार्षिक शुल्क देखील भरावं लागेल. (Changes in credit card rules)
पगारात वाढ होणार : कर्मचाऱ्यांसाठी पाचवा बदल अत्यंत महत्त्वाचा आहे. 1 सप्टेंबरपासून पगारदार वर्गाच्या पगारात बदल होणार आहे. आयकर विभागाकडून निवासाशी संबंधित नियम बदलले जात आहेत. या नव्या नियमानुसार कर्मचाऱ्यांना आता अधिक बचत करता येणार आहे. माहितीनुसार, सीबीडीटीनं भाडेमुक्त घरांच्या मूल्यांकनासाठी मूल्यांकन मर्यादा निश्चित केली आहे. यामुळे टेक होम पगारात वाढ होणार आहे. (Salary will increase from September)
या महिन्यात करा ही कामं : केंद्रातील मोदी सरकारनं 2000 रुपयांच्या नोटा बदलण्याची मुदत ३० सप्टेंबरपर्यंत निश्चित केली होती. त्यामुळे जर तुमच्याकडं 30 सप्टेंबरपूर्वी 2000 रुपयांच्या नोटा असतील तर बँकेत जाऊन त्या बदलून घ्या. तसं, या महिन्यात 16 दिवस बँकांमध्ये कोणतंही काम होणार नाही. हे काम तुम्हाला तुमच्या सोयीनुसार करावं लागणार आहे.
आधार कार्ड मोफत अपडेट करा : आधार कार्ड मोफत अपडेट करण्याची शेवटची संधी तुमच्या हातात आहे. मिळालेल्या माहितीनुसार, आधार कार्ड मोफत अपडेट करण्याची अंतिम मुदत 14 सप्टेंबर 2023 पर्यंत आहे. UIDAI नं आधार अपडेट करण्याची सुविधा मोफत दिली आहे. यापूर्वी ही सुविधा 14 जूनपर्यंत उपलब्ध होती. या तारखेनंतर अपडेट करण्यासाठी तुमच्याकडून शुल्क वसूल केलं जाईल. (Update Aadhaar Card)
डीमॅट खात्याच्या नामांकनाची अंतिम मुदत : डीमॅट खात्यात नामांकन करण्याची अंतिम मुदत देखील या महिन्यात संपत आहे. नामनिर्देशन नसलेलं डिमॅट खातं सेबीद्वारे निष्क्रिय मानलं जाणार आहे. त्यामुळे तुम्हाला डीमॅट खात्याचं नामनिर्देशन करावं लागणार आहे. (Nomination of Demat Account)
हेही वाचा -
- SC Hearing On Article 370 : जम्मू काश्मीरमध्ये कधीही निवडणूक घेण्यास तयार, केंद्र सरकारची सुप्रीम कोर्टाला ग्वाही
- LPG Cylinder Price : गृहिणींसाठी आनंदाची बातमी; सिलेंडरच्या किंमती 200 रुपयांनी स्वस्त
- China New Map : चीनच्या 'अशा' भूमिकेमुळं सीमाप्रश्न आणखी गुंतागुंतीचा - भारताचं चीनला चोख प्रत्युत्तर
