नवी दिल्ली : पंतप्रधान नरेंद्र मोदी शुक्रवारी व्हिडिओ कॉन्फरन्सिंगद्वारे सरकारी विभाग आणि संस्थांमध्ये नव्याने भरती झालेल्या सुमारे 71,000 नियुक्ती पत्रांचे वितरण करतील. या प्रसंगी पंतप्रधान या नियुक्त्यांना संबोधितही करतील, असेही प्रधानमंत्र्यांच्या कार्यालयाने सांगितले आहे. पंतप्रधान मोदी सकाळी 10:30 वाजता व्हिडिओ कॉन्फरन्सिंगद्वारे नियुक्ती पत्रांचे वितरण करतील.
कर्मयोगी प्रारंभ मॉड्यूल : रोजगार मेळा पुढील रोजगार निर्मितीमध्ये उत्प्रेरक म्हणून काम करेल आणि तरुणांना त्यांच्या सक्षमीकरणासाठी आणि राष्ट्रीय विकासात सहभागासाठी अर्थपूर्ण संधी प्रदान करेल अशी अपेक्षा आहे. भारत सरकारच्या नवीन भरती अंतर्गत देशभरातून निवडलेले ज्युनियर इंजिनीअर, लोको पायलट, तंत्रज्ञ, निरीक्षक, उपनिरीक्षक, कॉन्स्टेबल, स्टेनोग्राफर, कनिष्ठ लेखापाल, ग्रामीण डाक सेवक, आयकर निरीक्षक, शिक्षक, परिचारिका, डॉक्टर, सामाजिक सुरक्षा अधिकारी, PA, MTS हे विविध पदांवर रुजू होतील. या रोजगार मेळाव्यादरम्यान कर्मयोगी प्रारंभ मोड्यूलमधून शिकत असलेल्या नव्या अधिकार्‍यांचे अनुभवही शेअर केले जातील. कर्मयोगी प्रारंभ मॉड्यूल हा विविध सरकारी विभागांमधील सर्व नवीन नियुक्त्यांसाठी एक ऑनलाइन अभिमुखता अभ्यासक्रम आहे.
45 मंत्र्यांचा मेळाव्यात सहभाग : रोजगार मेळाव्या अंतर्गत तरुणांना नोकऱ्या देण्यासाठी जानेवारीमध्ये विविध केंद्रीय मंत्री वेगवेगळ्या राज्यांना भेट देतील. धर्मेंद्र प्रधान, पीयूष गोयल, हरदीप पुरी, अनुराग ठाकूर आणि इतर यांसारख्या ज्येष्ठ मंत्र्यांसह एकूण 45 मंत्री या मेळाव्यात भाग घेतील. केंद्रीय मंत्री नरेंद्रसिह तोमर भोपाळमध्ये, अनुप्रिया पटेल मुंबईत, अश्विनी चौबे नागपुरात, नित्यानंद राय पुण्यात, पीयूष गोयल नवी दिल्लीत, धर्मेंद्र प्रधान भुवनेश्वरमध्ये, हरदीपसिंग पुरी लुधियाना, गजेंद्र सिंह शेखावत लखनऊमध्ये, अर्जुन राम रामराजे भोपाळमध्ये, उदयपूरमध्ये मेघवाल, कानपूरमध्ये अनुराग सिंग ठाकूर, गाझियाबादमध्ये आर.के. पाटण्यात केंद्रीय मंत्री गिरिराज सिंह, फरिदाबादमध्ये भूपेंद्र यादव, जम्मूमध्ये अजय भट्ट, रांचीमध्ये पशुपतीनाथ पारस आणि बंगळुरूमध्ये प्रल्हाद जोशी उपस्थित असतील.
एकूण 10 लाख लोकांची भरती करणार : पंतप्रधानांनी 10 लाख लोकांची भरती करण्यासाठी रोजगार मेळा सुरू केला होता. बेरोजगारीच्या मुद्द्यावर विरोधकांकडून सतत टीका होत असताना गेल्या आठ वर्षांत नोकऱ्या निर्माण करण्यासाठी सरकारच्या प्रयत्नांना यात अधोरेखित केले आहे. पहिल्या टप्प्यात 75,000 हून अधिक लोकांना विविध सरकारी नोकऱ्यांसाठी नियुक्ती पत्र देण्यात आल्यानंतर आपल्या भाषणात पंतप्रधान मोदींनी जगभरातील अनेक देश हे विक्रमी महागाई आणि बेरोजगारीमुळे त्रस्त असल्याचे सांगून भारताच्या अर्थव्यवस्थेसमोरील आव्हानांची कबुली दिली. तसेच त्यांनी भारत या असुरक्षित परिस्थितीतून बाहेर येण्यासाठी सर्वतोपरी प्रयत्न करत असल्याचे सांगितले. पंतप्रधानांनी धनत्रयोदशीला केंद्रीय स्तरावर रोजगार मेळ्याची संकल्पना सुरू केली होती. केंद्र सरकारच्या 10 लाख नोकऱ्या देण्याच्या मोहिमेची ही सुरुवात होती. तेव्हापासून पंतप्रधानांनी गुजरात, जम्मू-कश्मीर आणि महाराष्ट्र सरकारच्या रोजगार मेळाव्याला संबोधित केले आहे.
हेही वाचा : PM Modi In Mumbai : डबल इंजिन सरकारमुळे महाराष्ट्राचा अभूतपूर्व विकास -पंतप्रधान
