बेंगळुरू: काँग्रेस नेत्या प्रियांका गांधी वाड्रा यांनी सोमवारी पक्षाच्या महिला अधिवेशनात बोलताना, सत्तेत आल्यास प्रत्येक घरातील गृहिणींना प्रत्येकी दोन हजार रुपये देण्याचे आश्वासन दिले. 'गृह लक्ष्मी' असे या योजनेचे शीर्षक असून, या योजनेचा 1.5 कोटी गृहिणींना फायदा होईल, असे कर्नाटक प्रदेश काँग्रेस कमिटीने (KPCC) म्हटले आहे. मे महिन्यापर्यंत विधानसभा निवडणुका होणाऱ्या राज्यातील सर्व घरांना दर महिन्याला 200 युनिट मोफत देण्याचे पक्षाने वचन दिल्याच्या काही दिवसांतच ही घोषणा झाली आहे.
प्रत्येक महिलेला आर्थिक स्वातंत्र्य मिळवून द्यायचे आहे : प्रियंका सोमवारी बेंगळुरूमध्ये पोहोचल्या. विमानतळावर माजी मुख्यमंत्री सिद्धरामयह, केपीसीसी अध्यक्ष डीके शिवकुमार आणि इतर नेत्यांनी त्यांचे स्वागत केले. उपस्थितांना संबोधित करताना गांधींनी लोकांना मतांसाठी आवाहन केले आणि भाजपच्या राजवटीत राज्यातील परिस्थिती पाहण्यास सांगितले. गृह लक्ष्मी योजने द्वारा काँग्रेसचा एलपीजी किमतींचा भार आणि स्त्रीला सहन करावा लागणारा महाग दैनंदिन खर्च वाटून घेण्याचा प्रयत्न आहे, असे पक्षाने म्हटले आहे. राज्यातील प्रत्येक महिला सक्षम व्हावी, ती स्वत:च्या पायावर उभी राहावी आणि आपल्या मुलांचीही काळजी घ्यावी, अशी काँग्रेसची इच्छा आहे. काँग्रेसला कर्नाटकातील प्रत्येक महिलेला आर्थिक स्वातंत्र्य मिळवून द्यायचे आहे, असे त्यात म्हटले आहे.
राज्यात महिलांसाठी स्वतंत्र जाहीरनामा : प्रियांका गांधी वाड्रा म्हणाल्या की राज्यात महिलांसाठी स्वतंत्र जाहीरनामा प्रसिद्ध केला जाईल. त्या म्हणाल्या, 'मला सांगण्यात आले आहे की कर्नाटकातील परिस्थिती अतिशय लाजिरवाणी आहे. तुमचे मंत्री नोकऱ्यांवर 40 टक्के कमिशन घेत आहेत'. कर्नाटकात जनतेचा दीड लाख कोटी रुपयांचा पैसा लुटला गेल्याचा आरोप त्यांनी केला आहे. बंगळुरूमध्ये 8,000 कोटी रुपयांचा विकास आणि 3,200 कोटी रुपये कमिशनमध्ये जात आहेत, असा आरोप त्यांनी केला आहे.
'कर्नाटकमध्ये लाच दिल्याशिवाय काहीही होत नाही' : कथित पोलीस उपनिरीक्षक भरती घोटाळ्याचा संदर्भ देत वाड्रा म्हणाल्या, 'कर्नाटकमध्ये लाच दिल्याशिवाय काहीही होत नाही. राज्यात पीएसआय घोटाळ्यासारखे लाजिरवाणे घोटाळे होत असून अनेक ठिकाणी पोलीस चौक्या विकल्या जात आहेत. सत्तेत असलेल्या लोकांकडून हीच अपेक्षा आहे का, असा सवाल त्यांनी केला आहे.
कर्नाटक प्रदेश काँग्रेस कमिटीचे बेंगळुरूत अधिवेशन : कर्नाटक प्रदेश काँग्रेस कमिटीने (KPCC) बेंगळुरूत अधिवेशनाचे आयोजन केले आहे. राज्यभरातून प्रत्येक ग्रामपंचायतीचे प्रतिनिधित्व करणाऱ्या एक लाखाहून अधिक महिला या अधिवेशनात सहभागी होणार आहेत. एआयसीसी अध्यक्ष मल्लिकार्जुन खरगे, काँग्रेस प्रदेशाध्यक्ष डी.के. शिवकुमार, विरोधी पक्षनेते सिद्धरामय्या आणि महिला विंगच्या अध्यक्षा पुष्पा अमरनाथ ही काही प्रमुख नावे या अधिवेशनात सहभागी होणार आहेत.
