बंगळुरू: भाजपाला 2024 च्या लोकसभा निवडणुकीत पराभूत करण्यासाठी विरोधी पक्ष एकजूट होत आहे. आज आणि उद्या विरोधी पक्षांची बैठक होत आहे. यापूर्वी विरोधकांची पाटण्यात एक सभा झाली होती, त्यानंतर विरोधक आज आणि उद्या बंगळुरूमध्ये एकत्र येत आहेत. बंगळुरूमध्ये होणाऱ्या या बैठकीचा अजेंडा आणि मिनिट टू मिनिटाचा कार्यक्रमही निश्चित करण्यात आला आहे. या बैठकीला सुमारे 24 विरोधी पक्ष उपस्थित राहणार असल्याचे सांगण्यात येत आहे. तर दिल्ली अध्यादेशाच्या मुद्द्यावरून काँग्रेसवर दबाव आणणाऱ्या आम आदमी पक्षानेही या बैठकीत सहभागी होण्याची घोषणा केली आहे. दरम्यान काँग्रेस पक्षाच्या माजी अध्यक्षा सोनिया गांधी आणि राहुल गांधी बंगळुरुमध्ये होणाऱ्या विरोधी पक्षाच्या बैठकीसाठी रवाना झाले आहेत.
डिनरसाठी दोन नेत्यांची दांडी : काँग्रेसच्या आवाहानानंतर आजपासून कर्नाटकची राजधानी बंगळुरूमध्ये विरोधी पक्षांच्या एकजुटीच्या नावाखाली दोन दिवसीय बैठक बोलावण्यात आली आहे. या बैठकीत 8 नवीन प्रादेशिक पक्ष सहभागी होण्याची शक्यता आहे. याआधी पश्चिम बंगालच्या मुख्यमंत्री ममता बॅनर्जी यांनी बैठकीत सहभागी होण्याची घोषणा केली होती. परंतु त्या आज विरोधी पक्षाच्या डिनर पार्टीत सहभागी होणार नाहीत. ममता बॅनर्जी यांच्या गुडघ्याचे ऑपरेशन नुकतेच झाले आहे. यामुळे त्यांना डॉक्टरांकडून काही सूचना देण्यात आल्या असल्याचे सांगण्यात येत आहे, यामुळे त्या डिनरला गैरहजर राहणार आहेत. तर राष्ट्रवादी काँग्रेसचे अध्यक्ष शरद पवारही डिनरला जाणार नाहीत.
आधीही झाली होती विरोधी पक्षाची बैठक : यापूर्वी 23 जून रोजी मुख्यमंत्री नितीश कुमार यांच्या आवाहनावर पाटणा येथे विरोधी पक्षांची बैठक झाली होती. या बैठकीत सर्वपक्षीयांमध्ये झालेल्या चर्चेत कोणताही अर्थपूर्ण निकाल लागला नसल्याचे सांगण्यात येत आहे. यानंतर काँग्रेसने दुसरी बैठक बोलावली आहे. आता सर्वांच्या नजरा आजच्या बैठकीकडे लागल्या आहेत. मिळालेल्या माहितीनुसार, या बैठकीत भाजपला पराभूत करण्यासाठी अजेंडा निश्चित केला जाण्याची शक्यता आहे. परंतु कारण महाराष्ट्रातील राजकारणात मोठी उलापालथ झाली आहे. विरोधी पक्षातील वरिष्ठ नेते आणि राष्ट्रवादी काँग्रेसचे अध्यक्ष शरद पवार यांच्या पक्षात फूट पडली आहे. अजित पवार यांनी भाजपसोबत जात पुढील वाटचाल सुरू केली आहे. शरद पवार उपस्थित राहणार नसल्याने विरोधकांचे एकमत होणार का का? हा प्रश्न उपस्थित होत आहे.
आज विरोधकांचं डिनर : विरोधकांची बैठक संध्याकाळी 6 ते 8 वाजण्याच्या सुमारास आयोजित करण्यात येणार आहे. ही एक औपचारिक बैठक असणार आहे. आज रात्री 8 वाजता कर्नाटकच्या मुख्यमंत्र्यांद्वारे सर्व विरोधी पक्षांसाठी स्नेहभोजनाच्या कार्यक्रमाचे आयोजन करण्यात आले आहे. 18 जुलैला सर्व बैठका सकाळी 11 वाजता सुरू होणार असल्याचे सांगण्यात येत आहे. संध्याकाळी 4 वाजेपर्यंत ही बैठक सुरू राहणार आहे. या बैठकीला काँग्रेसकडून पक्षाचे अध्यक्ष मल्लिकार्जुन खरगे, माजी अध्यक्षा सोनिया गांधी, राहुल गांधी आणि केसी वेणुगोपाळ उपस्थित राहणार आहेत. दरम्यान विरोधकांच्या बैठकीत आम आदमी पार्टी सहभागी होणार असल्याने विरोधकांची एकजूट होताना दिसत आहे. दिल्लीच्या अध्यादेशाविषयी काँग्रेसने पाठिंबा द्यावा, अशी इच्छा व्यक्ती केली होती. केजरीवाल यांच्या पाठिशी आता काँग्रेस उभी राहताना दिसत आहे. दिल्लीच्या अध्यादेशाविषयी काँग्रेस अध्यक्ष मल्लिकार्जुन खरगे यांनी आपली प्रतिक्रिया दिली आहे.
हे फक्त एका व्यक्तीचे नाही. जर देशाच्या लोकशाहीला आणि संविधानाला धक्का बसला, तर लोकशाही वाचवण्यासाठी एकत्र येऊन काम करणे ही आपली जबाबदारी आहे. कोणतीही व्यक्ती देश आणि संविधानापेक्षा मोठी नसते. - मल्लिकार्जुन खरगे
हेही वाचा -
- Congress Leaders Meeting: महाराष्ट्र काँग्रेसच्या वरिष्ठ नेत्यांची दिल्लीत बैठक सुरू, पक्षांतर्गत गटबाजीसह विरोधी पक्षनेता निवडीवर चर्चा होणार?
- Monsoon Session 2023 : 20 जुलैपासून संसदेचे पावसाळी अधिवेशन, विरोधी पक्ष सरकारला घेरण्याच्या तयारीत
- Kharge Address Party workers : ... तर संपूर्ण देशात लोकसभा निवडणूक जिंकू - काँग्रेसचे अध्यक्ष मल्लिकार्जुन खरगे
