नवी दिल्ली - आजपासून नवीन महिन्याला सुरुवात होत आहे. नवीन महिना महागाईचा नवा हप्ताही घेऊन येत आहे. 1 ऑगस्टपासून, म्हणजेच आजपासून, देशभरात बँकिंग आणि इंडिया पोस्टसह इतर क्षेत्रांशी संबंधित अनेक नियम बदलले जात आहेत. या बदलांचा तुमच्या खिशावर आणि दैनंदिन जीवनावरही परिणाम होईल.
हे नियम आजपासून लागू होत आहेत. जाणून घ्या, हे बदल कोणते आहेत आणि ते तुमच्यावर कसे परिणाम करतील.
एटीएममधून पैसे काढण्याचे शुल्क वाढणार
जर तुम्ही तुमच्या डेबिट किंवा क्रेडिट कार्डने इतर कोणत्याही बँकेच्या एटीएममधून पैसे काढले, तर यासाठी तुम्हाला आजच्या तुलनेत जास्त शुल्क भरावे लागेल. भारतीय रिझर्व्ह बँकेने (आरबीआय) सर्व बँकांना 1 ऑगस्टपासून त्यांचे इंटरचेंज शुल्क वाढवण्याची परवानगी दिली आहे. सध्या बँका प्रत्येक आर्थिक व्यवहारासाठी 15 रुपये इंटरचेंज चार्ज म्हणून आकारतात. आता 1 ऑगस्टपासून 2 रुपयांच्या वाढीसह, हे शुल्क 17 रुपये असेल. जर आपण नॉन-फायनेंशियल व्यवहारांबद्दल बोललो तर सध्या 5 रुपये इंटरचेंज शुल्क भरावे लागतात, जे आता 1 ऑगस्टपासून 6 रुपये होईल. आरबीआयच्या सुधारित नियमांनुसार ग्राहक त्यांच्या बँकेच्या एटीएममधून दरमहा पाच मोफत व्यवहार करू शकतात. त्याच वेळी, ग्राहक इतर बँकांच्या एटीएममधून मेट्रो शहरांमध्ये तीन आणि नॉन-मेट्रो शहरांमध्ये पाच मोफत एटीएम व्यवहार करू शकतात. यानंतर तुम्हाला प्रत्येक व्यवहारासाठी अतिरिक्त शुल्क भरावे लागेल.
ICICI बँकेच्या सेवा होतील महाग
भारतातील आघाडीच्या खासगी बँक ICICI च्या अनेक सेवा वापरताना, तुम्हाला 1 ऑगस्टपासून जास्त पैसे द्यावे लागतील. बचत खातेधारकांसाठी एटीएम इंटरचेंज फी आणि चेक बुक शुल्क उद्यापासून वाढणार आहे. यासह, बँक आपल्या ग्राहकांना चार मोफत व्यवहार करण्याची सुविधा देईल. त्यानंतर तुम्हाला प्रति व्यवहार 150 रुपये शुल्क भरावे लागेल.
आता सुट्टीच्या दिवशीही जमा होणार पगार
1 ऑगस्टपासून नॅशनल ऑटोमेटेड क्लिअरिंग हाऊस (NACH) ची प्रणाली आठवड्यातून सात दिवस उपलब्ध असेल. NACH ही एक बल्क पेमेंट सिस्टीम आहे ज्याद्वारे बँका पगार आणि पेन्शन ट्रान्सफर करतात. पगाराबरोबरच ईएमआय, बिल भरणे आणि कर्ज भरणे इत्यादी सुविधा देखील याद्वारे केले जातात. आतापर्यंत पगार-पेन्शन वगैरे सुट्टीच्या दिवशी दिले जात नव्हते आणि या सुविधा फक्त बँकांच्या कामकाजाच्या दिवशी उपलब्ध असतात. मात्र, RBI च्या नवीन नियमांनुसार आता सुट्टीच्या दिवशीही पगार आणि पेन्शन तुमच्या खात्यात जमा होईल.
इंडिया पोस्टच्या डोअरपोस्ट सेवेसाठी शुल्क आकारले जाईल
आजपासून, जर तुम्ही पोस्ट विभागाच्या इंडिया पोस्ट पेमेंट बँकेच्या (IPPB) डोअरपोस्ट सेवा वापरता, तर तुम्हाला यासाठी अतिरिक्त शुल्क भरावे लागेल. आयपीपीबी सध्या आपल्या डोअरपोस्ट सेवेसाठी ग्राहकांकडून कोणतेही शुल्क आकारत नाही. मात्र, उद्यापासून तुम्हाला ते वापरण्यासाठी प्रति सेवा 20 रुपये जीएसटी भरावा लागेल.
एलपीजीचे दर बदलू शकतात
नियमानुसार, प्रत्येक महिन्याच्या 1 तारखेला देशभरात एलपीजी सिलिंडरच्या किमतीत बदल होतो. गेल्या काही दिवसांविषयी बोलायचे झाले तर एप्रिलमध्ये एलपीजी सिलेंडरच्या किंमतीत 10 रुपयांची कपात करण्यात आली होती. यानंतर मे-जूनमध्ये घरगुती सिलिंडरच्या किंमतीत कोणताही बदल झाला नाही. जुलै महिन्यात त्यांच्या किमती 25 रुपयांनी वाढवण्यात आल्या.
हेही वाचा - 'झिका'चा पहिला रुग्ण आढळला, मात्र चिंतेचे कारण नाही; वाचा, आरोग्यमंत्री काय म्हणाले?
