नवी दिल्ली -पंढरपूर मंगळवेढेमध्ये आज मतदान होत आहे. भाजप खासदार आणि रेल्वे राज्यमंत्री सुरेश अंगडी यांच्या निधनानंतर रिक्त झालेल्या जागेसाठी बेळगाव लोकसभा मतदारसंघात पोटनिवडणूक होत आहे. पश्चिम बंगालमध्ये विधानसभा निवडणूक मतदान आज होणार आहे.
१. कोरोनामुळे निरंजनी आणि आनंद आखाड्याकडून १७ एप्रिलला कुंभमेळा समाप्तीची घोषणा
हरिद्वार- कोरोना महामारीमुळे यंदाचा कुंभमेळा वादाच्या भोवऱ्यात सापडला आहे. कुंभमेळ्यात सहभागी झालेल्या भाविकांसह साधुंना कोरोनाची लागण झालेली आहे. या पार्श्वभूमीवर निरंजनी आणि आनंद आखाड्याने कुंभमेळा आज समाप्त होणार असल्याची घोषणा केली आहे. हा आखाडा परिषदेचा नव्हे तर वैयक्तिक निर्णय असल्याचेही या आखाड्यांनी स्पष्ट केले आहे.
२. बेळगाव लोकसभा पोटनिवडणुकीसाठी आज मतदान
भाजप खासदार आणि रेल्वे राज्यमंत्री सुरेश अंगडी यांच्या निधनानंतर रिक्त झालेल्या जागेसाठी बेळगाव लोकसभा मतदारसंघात पोटनिवडणूक होत आहे. या जागेसाठी आज मतदान होणार आहे. तर २ मे रोजी निवडणुकीचा निकाल जाहीर होणार आहे. या निवडणुकीत भाजपकडून सुरेश अंगडी यांच्या पत्नी मंगला अंगडी आणि काँग्रेसचे आमदार सतीश जारकीहोळी रिंगणात आहेत. त्यांच्याविरोधात महाराष्ट्र एकीकरण समितीचे शुभम शेळके अशी तिरंगी लढत आहे.
३. पंढरपूर मंगळवेढा विधानसभा मतदारसंघासाठी आज मतदान
पंढरपूर मंगळवेढा विधानसभा मतदारसंघ पोटनिवडणुकीसाठी आज मतदान होणार आहे आहे. राष्ट्रवादीने भारत भालकेंचे सुपुत्र भगीरथ भालके यांना उमेदवारी देऊन जोरदार प्रचार केला आहे भालकेंच्याविरोधात भाजपचे समाधान आवताडे रिंगणात उतरले आहेत. निवडणुकीचा निकाल २ मे रोजी लागणार आहे.
४. तामिळनाडू, केरळ आणि कर्नाटकमध्ये पावसाचा अंदाज
पश्चिमी हिमालयीन क्षेत्रात पश्चिमी विक्षोभ उत्पन्न होत आहे. हा पश्चिमी विक्षोभ 14 एप्रिलपासून 17 एप्रिलपर्यंत वातावरणावर परिणाम करेल, असे हवामानशास्त्र विभागाने म्हटले आहे. तामिळनाडू, केरळ आणि कर्नाटकच्या तटीय क्षेत्रातही पावसाची शक्यता आहे.
५. पश्चिम बंगालमध्ये विधानसभा निवडणुकीत आज मतदान
पश्चिम बंगालमध्ये विधानसभा निवडणूक मतदान आज होणार आहे. सहा जिल्ह्यातील ४५ जागांवरील उमेदवारांचे भविष्य आज मतदानपेटीत बंद होणार आहे. कोरोना असला तरी भाजपकडून पश्चिम बंगालमध्ये निवडणुकीचा जोरदार प्रचार करण्यात आला आहे.
६. फिलिप यांच्यावर अंतिमसंस्कार-
राजकुमार हॅरी यांचे आजोबा आणि ड्युक ऑफ एडिनबर्ग प्रिन्स फिलिप यांच्या अंत्यसंस्कारात सहभागी होण्यासाठी अमेरिकेतून इंग्लंडला आले आहेत. ९९ वर्षांचे फिलिप यांचे गेल्या शुक्रवारी निधन झाले. त्यांच्यावर शनिवारी, १७ एप्रिलला विंडसर कॅसलच्या सेंट जॉर्ज चॅपल येथे अंत्यसंस्कार होणार आहेत.
७. पुणे-अजनी विशेष एक्सप्रेसच्या फेऱ्या बंद
कोरोना महामारीमुळे रेल्वेला फटका बसला आहे. मध्य रेल्वेने १२ मेल, एक्सप्रेस बंद केल्या आहेत. पुणे-अजनी विशेष एक्सप्रेसच्या फेऱ्या आजपासून १ मेपर्यंत बंद राहणार आहेत.
८. अर्ज करण्याच्या मुदतीत वाढ
मिलिट्री इंजिनीअर सर्व्हिसेसने (MES) सदर्न कमांड, पुणे येथे ड्रॉफ्ट्समन आणि सुपरवायजरच्या एकूण ५०३ पदांवर भरतीसाठी अर्ज मागवण्याच्या मुदतीत वाढ केली आहे. अर्ज करण्याची मुदत १२ एप्रिल २०२१ रोजी रात्री संपत होती. ही मुदत आणखी पाच दिवस वाढवण्यात आली आहे. ही मुदत आज संपत आहे.
९. सोलापुरात आजपासून कडक लॉकडाऊन
कोरोना संसर्ग वाढता शहरात लॉकडाऊनची कडक अंमलबजावणी केली जात आहे. हे नियम आणखीन कडक करणारे आदेश महानगरपालिका आयुक्त पी. शिवशंकर यांनी शुक्रवारी रात्री उशिरा काढले आहेत. शहरात अत्यावश्यक सेवेतील दुकाने सकाळी 7 ते दुपारी 1 वाजेपर्यंत चालू राहणार आहेत. त्यानंतर हेर फिरणाऱ्या व्यक्तींना मात्र कारवाईस सामोरे जावे लागणार आहे.
१०. मुंबई इंडियन्सचा सनरायझर्स हैदराबादबरोबर आज सामना
मुंबई इंडियन्सचा सनरायझर्स हैदराबादबरोबर आज सामना होणार आहे. हा सामना चेन्नईमधील चिदंबरम स्टेडियममध्ये खेळला जाणार आहे. हैदराबादला आयपीएलच्या या सत्रात केकेआर आणि आरसीबीकडून पराभव स्वीकारावा लागला आहे.
