नवी दिल्ली : जम्मू - काश्मीरचे माजी राज्यपाल सत्यपाल मलिक यांची सुरक्षा कमी करण्यात आली असून झेड प्लसऐवजी आता त्यांच्या सुरक्षेत खासगी सुरक्षा अधिकारी तैनात करण्यात येणार आहेत. यावर सत्यपाल मलिक यांनी तीव्र प्रतिक्रिया दिली आहे. हे राजकीय सूडबुद्धीतून केले जात असल्याचे सत्यपाल मलिक म्हणाले आहेत. सत्यपाल मलिक यांच्या कार्यकाळात जम्मू - काश्मीरमधून कलम ३७० हटवण्यात आले होते. तसेच शेतकरी आंदोलनादरम्यान सत्यपाल मलिक यांनी शेतकऱ्यांची बाजू घेत सरकार विरुद्ध भूमिका घेतल्याने वाद निर्माण झाला होता.
'मी एकटाच मोदींच्या विरोधात बोललो' : ईटीव्ही भारतशी बोलताना सत्यपाल मलिक म्हणाले, 'माझी झेड प्लस सुरक्षा काढून घेण्याचे एकमेव कारण म्हणजे मी राज्यपाल असतानाही शेतकरी कायद्यांच्या मुद्यावरून सरकारचे समर्थन केले नव्हते. पंतप्रधान मोदींच्या विरोधात काहीही बोलण्याची हिंमत पक्षातील कोणातच नाही. पण मी एकटाच होतो, ज्याने शेतकऱ्यांची बाजू घेतली. यामुळे त्यांना त्रास झाला असावा आणि त्यामुळेच माझी सुरक्षा काढून घेण्यात आली आहे. ते पुढे म्हणाले की, 'उद्या मी एका सार्वजनिक सभेत सहभागी होण्यासाठी हरियाणातील नारनौल येथे जात आहे. अशा परिस्थितीत आता माझ्या सुरक्षेचा प्रश्न निर्माण झाला आहे. माझ्यावर कोणी हल्ला केला किंवा मला इजा करण्याचा प्रयत्न केला तर काय होईल? अशावेळी सर्व जबाबदारी केंद्र सरकारची असेल.
'अमित शाह दयाळू व्यक्ती आहेत' : कोणत्याही राजकीय पक्षाने किंवा नेत्याने त्यांच्याशी संपर्क साधला आहे का? असे विचारले असता ते म्हणाले की, मला अनेक नेत्यांचे फोन आले आहेत, पण मी त्यांचे नाव घेणार नाही. मी आजच माझ्या सुरक्षा डाउनग्रेडबद्दल ही माहिती दिली आहे आणि या वरूनही मला बरेच कॉल येतील पण मला कोणीही गप्प करू शकत नाही. मी बोलत राहीन.' या कल्पनेमागे कोणाचे मन असू शकते आणि गृहमंत्री अमित शहा यामागे असू शकतात का, असा प्रश्न विचारल्यावर ते म्हणाले, 'अमित शाह एक दयाळू व्यक्ती आहेत. हे पंतप्रधान मोदींनी केले आहे. कारण मी शेतकऱ्यांसाठी बोललो तेव्हा ते माझ्यावर खूश नव्हते. माझी सुरक्षा काढून घेतल्याने हे सर्व स्पष्ट झाले आहे.
'माझ्या एकट्याचीच सुरक्षा काढली' : सत्यपाल मलिक म्हणाले की, 'मी जेव्हा काश्मीरचा राज्यपाल होतो, तेव्हा मला सुरक्षेच्या धोक्यांबाबत बरीच माहिती मिळायची. मी जेव्हा दिल्लीला परत आलो तेव्हा सुरक्षेच्या या समस्या अजूनही होत्या कारण माझ्या कार्यकाळात कलम 370 रद्द करण्यात आले होते. पाकिस्तान, काश्मिरी दहशतवादी आणि इतरांकडून सुरक्षेला खरे धोके आहेत. त्यामुळे इतर कोणत्याही गव्हर्नरची सुरक्षा काढून घेण्यात आली नसताना मी एकटाच आहे ज्याची झेड प्लस सुरक्षा काढून टाकण्यात आली आहे.
'मला कोणीही गप्प करू शकत नाही' : ते पुढे म्हणाले की, 'मी गप्प बसणार नाही आणि मला कोणीही गप्प करू शकत नाही. मला काही झाले तर त्याचे परिणाम त्यांना भोगावे लागतील. वेळच सर्व काही सांगेल. ते म्हणाले की, सुरक्षेच्या मुद्द्यावरून त्यांनी गेल्या वर्षी ऑक्टोबरमध्ये गृह मंत्रालयाला पत्र लिहिले होते. मात्र त्यांच्याकडून अद्याप कोणताही प्रतिसाद मिळालेला नाही. त्यांच्या पत्रांना उत्तर म्हणून केवळ अमित शाह यांच्या गृहमंत्रालयाचे पत्र आले आहे.
'शेतकऱ्यांसाठी बोलतच राहणार' : सत्यपाल मलिक यांनी गेल्या वर्षी दावा केला होता की, जम्मू आणि काश्मीरचे राज्यपाल असताना फायली साफ करण्यासाठी त्यांना 300 कोटी रुपयांची लाच देऊ केली गेली होती. त्यांच्या दाव्यांबद्दल सीबीआयने त्यांची चौकशी देखील केली होती. मलिक यांनी आतापर्यंत कोणत्याही पक्षात प्रवेश केल्याचा दावा फेटाळून लावला आहे. शेतकऱ्यांसाठी बोलतच राहणार असल्याचं मलिक यांनी म्हटलं आहे. येत्या निवडणुकीत मी त्यांचे कंबरडे मोडेन, असेही ते म्हणाले.
हेही वाचा : Parliament Budget Session : लोकसभेचे कामकाज दोन वाजेपर्यंत तहकूब, अदानी मुद्द्यावरून विरोधकांचा गदारोळ
