election results Vote Counting : युपीतील महापालिकेत कोण मारणार बाजी? जालंधरमध्ये लोकसभा तर युपीमध्ये विधानसभा पोटनिवडणुकीची आज मतमोजणी

By election results 2023 : उत्तर प्रदेश विधानसभा पोटनिवडणुकीच्या मतमोजणीला सकाळी 8 वाजल्यापासून सुरुवात झाली. त्याचबरोबर राज्यातील काही महापालिका निवडणुकीचे निकाल आज लागणार आहेत.

Election result : उत्तर प्रदेश आणि पंजाबमध्ये मतमोजणीची धावपळ चालू आहे. उत्तर प्रदेश विधानसभा पोटनिवडणूक आणि महापालिकेच्या निवडणुकांची मतमोजणी केली जात आहे. तर पंजाबमध्येही लोकसभेच्या पोटनिवडणुकीसाठी मतमोजणी होत आहे. 10 मे रोजी जालंधर लोकसभा पोटनिवडणूक झाली होती, त्याचे निकाल आज हाती येणार आहेत. उत्तर प्रदेश विधानसभा पोटनिवडणुकीच्या मतमोजणीला सकाळी 8 वाजल्यापासून सुरुवात झाली आहे. त्याचबरोबर राज्यातील काही महापालिका निवडणुकीचे निकालही आज लागणार आहेत. राजधानी लखनौच्या महागनरपालिकेच्या जागेवर सर्वांच्या नजरा लागल्या आहेत. यानिवडणुकीत भाजपापुढे पुन्हा पुनरागमन करण्याचे आव्हान आहे. सपा,काँग्रेस आणि आम आदमी पार्टीसोबत भाजपाची टक्कर आहे.

महापालिकेच्या रिंगणात उतरलेत इतके उमेदवार : लखनौच्या महानगरपालिकेच्या जागेवर सर्वांच्या नजरा लागल्या आहेत. लखनौ महानगरपालिका निवडणुकीची मतमोजणी सुरू झाली आहे. लखनौला आज नवे महापौर आणि ११० प्रभागांचे नगरसेवक मिळणार आहेत. या जागेसाठी ४ मे रोजी मतदान झाले होते. लखनौ महानगरपालिकेच्या जागेवर महापौरपदासाठी 13 उमेदवार रिंगणात आहेत, तर 110 प्रभागांच्या नगरसेवकांसाठी 807 उमेदवारांमध्ये सामना रंगला आहे.

हे आहेत महापौर पदाचे उमेदवार : भाजपाने महापौरपदासाठी सुषमा खरवाल यांना उमेदवारी दिली आहे, तर सपाकडून वंदना मिश्रा रिंगणात आहेत. बसपाने शाहीन बानो यांना, तर आम आदमी पार्टीने अंजू भट्ट यांना महापौर बनवण्यासाठी निवडणुकीच्या रिंगणात उतरवले आहे. दरम्यान भाजपसाठी ही निवडणूक सुरक्षित असल्याचे मानले जात आहे, परंतु मतदान कमी झाल्याने भाजपाची चिंता वाढली आहे. यावेळी येथे केवळ 36.97 टक्के मतदान झाले आहे.

मागील काळात भाजपाची कामगिरी : 2017 च्या महापालिका निवडणुकीत एकूण 16 महापालिकांमध्ये निवडणुका झाल्या होत्या. यामध्ये भाजपाने लखनौ, वाराणसी, आग्रा, मथुरा, फिरोजाबाद, मुरादाबाद, सहारनपूर, झाशी, गोरखपूर, प्रयागराज, गाझियाबाद, शाहजहानपूर, बरेली, कानपूर आणि अयोध्याच्या महापौरपदाच्या जागा जिंकल्या. तर अलिगड आणि मेरठमध्ये बसपचे महापौर विजयी झाले होते. आणि यावेळी शहाजहानपूर जिल्ह्याला पहिला महापौर मिळाल्या होत्या.

या ठिकाणी महिलांसाठी जागा राखीव : यावेळी एकूण 17 महानगरपालिकांपैकी लखनौ, कानपूर आणि गाझियाबाद सर्वसाधारण प्रवर्गातील महिलांसाठी राखीव होत्या. तर शाहजहानपूर आणि फिरोजाबादमध्ये ओबीसी महिलांसाठी जागा राखीव ठेवण्यात आल्या होत्या. तर अडरा हे अनुसूचित जाती महिलांसाठी राखीव होते. राज्यातील 75 जिल्ह्यांतील 760 स्थानिक स्वराज्य संस्थांच्या निवडणुका दोन टप्प्यात पार पडल्या.

जालंधर लोकसभा पोटनिवडणूक : काँग्रेस पक्षाचा बालेकिल्ला समजल्या जाणाऱ्या जालंधर लोकसभा जागेच्या पोटनिवडणुकीत आप, काँग्रेस, शिरोमणी अकाली दल आणि भाजप यांच्यात चौरंगी लढत आहे. आपचे सुशील रिंकू, काँग्रेसचे करमजीत कौर चौधरी, भारतीय जनता पक्षाचे इंदर इकबाल सिंग अटवाल आणि शिरोमणी अकाली दलाचे (एसएडी) सुखविंदर कुमार सुखी यांच्यात चुरशीची लढत आहे.

युपीतील विधानसभा पोटनिवडणूक : रामपूर जिल्ह्यातील स्वार आणि मिर्झापूरच्या छानबे येथे विधानसभेच्या जागेसाठी पोटनिवडणूक झाली आहे. आज येथे मतमोजणी केली जात आहे. स्वार जागेसाठी सहा उमेदवार, तर छानबे येथील जागेसाठी आठ उमेदवार निवडणुकीच्या रिंगणात उतरले होते. या 13 उमेदवारांच्या भवितव्याचा निकाल आज लागणार आहे.

हेही वाचा -