कांकेर (छत्तीसगड) : छत्तीसगडमध्ये गेल्या काही दिवसांपासून नक्षलवादी घटनांमध्ये वाढ झाली आहे. अमित शहांच्या बस्तर दौऱ्यानंतर नक्षलवादी सातत्याने जवानांवर आपला राग काढत आहेत. विजापूरमध्ये सोमवारी झालेल्या आयईडी स्फोटानंतर आज कांकेरमध्ये आयईडीचा स्फोट झाला. ज्यामध्ये बीएसएफचे दोन जवान जखमी झाले आहेत. कोयलीबेडा येथील दुडा आणि चिलपारस कॅम्प दरम्यान कागबरस टेकडीजवळ आयईडी स्फोट झाला.
कांकेरमध्ये आयईडी स्फोटात जवान जखमी : कांकेरचे एसपी शलभ कुमार सिन्हा यांनी आयईडी स्फोट झाला असल्याचे सांगितले आहे. त्यांनी सांगितले की, बीएसएफचे जवान गस्त घालण्यासाठी बाहेर पडले होते. त्याचवेळी सीओबी चिलपारा पासून सुमारे अडीच किलोमीटर उत्तरेला आणि सीओबी धुट्टाच्या दक्षिणेला सुमारे 1 किलोमीटर अंतरावर नक्षलवाद्यांनी एका नाल्यात आयईडी पेरला होता. या स्फोटात बीएसएफचे जवान क्रमांक ११२४३५१२ सीटी सुशील कुमार यांच्या चेहऱ्यावर आणि डोळ्यांवर जखमा झाल्या आहेत. क्र. 12061056 सीटी छोटूराम यांच्या उजव्या पायाला आणि हाताला दुखापत झाली आहे. कोयलीबेडा आरोग्य केंद्रात जखमी जवानांवर प्राथमिक उपचार केल्यानंतर त्यांना हेलिकॉप्टरने रायपूरला पाठवण्यात आले आहे.
