लखनऊ : भारत- चीन सीमा वादानंतर चिनी वस्तू आणि सेवांवर बहिष्कार घालण्याचे अभियान सबंध भारतात जोर धरत आहे. नुकतेच केंद्रीय माहिती तंत्रज्ञान मंत्रालयाने माहिती सुरक्षेचे कारण देत चीनच्या 59 मोबाईल अ‌ॅपवर बंदी घातली आहे. त्यानंतर उत्तरप्रदेशातील एका माजी महिला आमदाराने मोबाईलमधून चिनी अ‌ॅप डिलीट करणाऱ्यांना मोफत मास्क वाटप करण्याचे अभियान राबविले आहे.
अनुपमा जैसवाल असे या माजी महिला आमदाराचे नाव असून त्या याआधी उत्तरप्रदेश सरकारमध्ये मंत्रीपदावर होत्या. चिनी माल हटाव मोहिमेला बळकटी देण्यासाठी त्यांनी हा उपक्रम सुरु केला आहे. यासाठी त्यांनी स्थानिक महिला मोर्चा संघटनेचीही मदत घेतली आहे. जो मोबाईलमधील चिनी अ‌ॅप डिलीट करेल त्याला मास्क देण्यात येत आहे. जैसवाल या योगी आदित्यनाथ सरकारमध्ये प्राथमिक शिक्षण मंत्रीही होत्या.
भारतीय नागरिकांची माहिती चिनी अ‌ॅपवर सुरक्षित नसल्याचे म्हणत या अ‌ॅप्सवर बंदी घालण्यात आली आहे. देशाची एकात्मता आणि सार्वभौमत्व धोक्यात आल्याचे माहिती तंत्रज्ञान मंत्रालयाने म्हटले आहे. नागरिकांची माहिती सुरक्षित नसल्याच्या अनेक तक्रारीही सरकारकडे आल्या होत्या, त्यानुसार ही बंदी घालण्यात आल्याचे मंत्रालयाने सांगितले.
बंदी घालण्यात आलेल्या कंपन्यांची सरकारशी चर्चा सुरु
बंदी घालण्यात आलेल्या 59 अ‌ॅप्ससंबधी या चिनी कंपन्या आता सरकारबरोबर चर्चा करत आहे. सरकारने प्राथमिक बंदी घातली असून आम्ही सरकारच्या नियम आणि अटींची पुर्तता करण्याचा प्रयत्न करत आहोत. असे या कंपन्यांनी म्हटले आहे. चीनची अ‌ॅप बंद केल्यामुळे भारतातील रोजगार धोक्यात येईल, असे भारतातील चिनी दुतावास कार्यालयाने म्हटले आहे. तसेच चिंता व्यक्त केली आहे.
