बंगळुरूत दोन इसिस संशयित ताब्यात, एनआयएच्या पथकाची कारवाई

कर्नाटकातील बंगळुरूमधून इसिसशी संबंधित दोन संशयीतांना राष्ट्रीय तपास यंत्रणेने ताब्यात घेतले आहे. याचबरोबर आज सकाळी काश्मीरमध्ये एनआयएच्या पथकाने छापे मारले. एनआयए सीमेपलीकडून होत असलेल्या टेरर फंडिंग प्रकरणाचा तपास करत आहे.

बंगळुरु - राष्ट्रीय तपास यंत्रणेने (एनआयए) कर्नाटकातील बंगळुरूमधून दोन संशयीतांना ताब्यात घेतले आहे. या दोघांचा इराण आणि सीरियामधील इस्लामिक स्टेटशी (इसिस) संबंध असल्याचा संशंय आहे.

यापूर्वी 8 ऑक्टोबरला राष्ट्रीय तपास संस्थेनं इस्लामिक स्टेटसाठी काम करणाऱ्या दोघांना बंगळुरुतून अटक केली होती. दोघेही इस्लामिक स्टेटच्या संपर्कात होते आणि त्यांनी इराक, सीरियाचा दौराही केला होता.

काश्मीरमध्येही कारवाई -

काश्मीरमध्ये एनआयएच्या पथकाने बुधवारी सकाळी छापे मारले. टेरर फंडिंगप्रकरणी हे छापे टाकण्यात आले आहेत. आतापर्यंत झालेल्या तपासणीत मिळालेल्या पुराव्याच्या आधारे हे छापे टाकण्यात आल्याची माहिती आहे. सीमेपलीकडून होत असलेल्या टेरर फंडिंग प्रकरणाचा तपास गेल्या अनेक दिवसांपासून एनआयए करत आहे. काही दिवसांपूर्वीच एका व्यक्तीला काश्मीरमधून पकडण्यात आले होते.