- परभणी - 'माजी बांधकाम मंत्री चंद्रकांत पाटील यांच्याप्रमाणे तारीख पे तारीख देण्याचे काम मी करणार नाही. त्यांनी त्यांच्या कार्यकाळात केलेले खड्डे बुजवण्याचा कार्यक्रम आता माझ्याकडे आहे. मात्र, मी रस्त्यांच्या कामांवर कटाक्षाने लक्ष ठेवून आहे. ते दर्जेदार आणि वेळेत पूर्ण झाले पाहिजे, यासाठी अधिकाऱ्यांना निर्देश दिले असल्याचे राज्याचे सार्वजनिक बांधकाम मंत्री अशोक चव्हाण यांनी आज परभणीत सांगितले. तसेच सर्वोच्च न्यायालयात मराठा आरक्षणावरील अंतरिम स्थगिती हटवण्यासाठी आम्ही प्रयत्न करत असल्याचेही चव्हाण म्हणाले.
सविस्तरवाचा : खड्डे बुजवण्याचा चंद्रकांत पाटलांचा कार्यक्रम आता माझ्याकडे; मंत्री अशोक चव्हाणांचा टोला
- मुंबई - राष्ट्रवादी काँग्रेसचे अध्यक्ष शरद पवार व मुख्यमंत्री उद्धव ठाकरे यांच्यामध्ये आज पुन्हा एकदा वर्षा बंगल्यावर राज्यपाल नियुक्त त्या 12 जागांच्या संदर्भात चर्चा झाली आहे. यासाठी आज पवार व मुख्यमंत्री यांची आज वर्षा बंगल्यावर एक बैठक पार पडली. तब्बल एक तासाहून अधिक वेळ चाललेल्या या बैठकीमध्ये विधानपरिषदेच्या त्या 12 जागा सोबतच राज्यातील शेतकऱ्यांचे प्रश्न, राज्यातील कोरोनाची परिस्थिती तसेच मराठा आंदोलकांकडून सुरू असलेली आक्रमक भूमिका आणि त्या आडून विरोधकांचे डावपेच आदी विषयावर चर्चा झाली असल्याचे सांगण्यात येते.
सविस्तरवाचा : शरद पवार व मुख्यमंत्री उद्धव ठाकरे यांच्यात 'त्या' 12 जागांसाठी पुन्हा एकदा चर्चा
- मुंबई - आज राज्यात ६ हजार १९० नवीन कोरोना रुग्णांचे निदान झाले आहे. राज्यात आज १२७ कोरोनाबाधित रुग्णांच्या मृत्यूंची नोंद झाली आहे. राज्यात आज ८ हजार २४१ रुग्ण बरे होऊन घरी गेले असून, राज्यात आजपर्यंत एकूण १५ लाख ३ हजार ५० कोरोनाबाधित बरे झाले आहेत. राज्यातील रुग्ण बरे होण्याचे प्रमाण ८९.८५ टक्के एवढे झाले आहे.
सविस्तरवाचा : राज्यात ६ हजार १९० नवीन कोरोना रुग्णांची वाढ; १२७ मृत्यू
- जालना - वारकऱ्यांच्या विविध मागण्यांसंदर्भात आत्तापर्यंत अनेक आंदोलने केली, मोर्चे काढले, या सर्व प्रकाराला विद्यमान मुख्यमंत्री उद्धव ठाकरे यांचा पाठिंबा होता. एवढेच नव्हे तर उद्योगमंत्री देसाईदेखील या आंदोलनामध्ये सहभागी झाले होते. मात्र, उद्धव ठाकरे हे सत्तेत येताच त्यांना वारकऱ्यांचा विसर पडला आहे, असा आरोप वारकरी प्रबोधन सेवा मंडळाने केला आहे.
सविस्तरवाचा : उद्धव ठाकरे सत्तेत आले आणि वारकऱ्यांचा विसर पडला; वारकरी प्रबोधन सेवा मंडळाचा आरोप
- वॉशिंग्टन डी.सी - अमेरिकेतील राष्ट्राध्यक्ष पदाच्या निवडणुका अवघ्या चार दिवसांवर आल्या आहेत. डेमोक्रॅटिक पक्षाचे राष्ट्राध्यक्ष पदाचे उमेदवार जो बायडेन आणि राष्ट्राध्यक्ष डोनाल्ड ट्रम्प यांच्यात जोरदार टक्कर पाहायला मिळत आहे. शेवटच्या टप्प्यातील प्रचार शिगेला पोहचला आहे. डेमोक्रॅटिक पक्षाचे उमेदवार जो बायडने फ्लोरिडात प्रचार सभा घेत असताना अचानक पाऊस आला. मात्र, त्यांनी भाषण सुरूच ठेवले. त्यामुळे नेटकऱ्यांना शरद पवारांच्या साताऱ्यातील वादळी सभेची आठवण झाली.
सविस्तरवाचा : शरद पवारांप्रमाणे बायडेन यांचीही पावसातली सभा अमेरिकेत गेमचेंजर ठरणार का?
- अकोला - केंद्र सरकारने जर शेतकऱ्यांसाठी पॅकेज जाहीर केले नाही, तर 5 नोव्हेंबरपासून केंद्रातील जे मंत्री राज्यामध्ये राहत आहेत त्यांच्या घरासमोर स्वाभिमानी शेतकरी संघटना आंदोलन करेल. बसूनच आंदोलन नव्हे तर त्या मंत्र्यांचे कपडे फाडून आंदोलन करणार आहे. यासोबतच राज्यातील मंत्र्यांचेही आम्ही कपडे फाडणार आहोत. तसेच ज्या अधिकाऱ्यांनी नुकसानीचे पंचनामे किंवा अहवाल चुकीचा पाठवला आहे. त्या अधिकाऱ्यांचा शोध घेऊन त्यांचेही कपडे फाडणार असल्याचे स्वाभिमानी शेतकरी संघटनेचे नेते रविकांत तुपकर यांनी आज सांगितले.
सविस्तरवाचा : ..तर मंत्र्यांचे व अधिकाऱ्यांचे कपडे फाडणार, रविकांत तुपकर यांचा इशारा
- केवडीया - पंतप्रधान नरेंद्र मोदी यांनी आज गुजरातच्या नर्मदा जिल्ह्यातील केवडियामध्ये आरोग्य वन, एकता मॉल आणि चिल्ड्रन न्युट्रीशियन पार्कचे उद्घाटन केले. तसेच अन्य काही प्रकल्पांच्या कामाचे भूमीपूजनही त्यांनी केले. यावेळी राज्यपाल आचार्य देवव्रत आणि मुख्यमंत्री विजय रुपानी उपस्थित होते. आरोग्य वनात जवळपास 15 एकर परिसरात औषधीयुक्त वनस्पतींचे रोपण करण्यात आले आहे. यात 380 प्रजातींची 5 लाख रोपं आहेत. योग आणि आयुर्वेद लक्षात घेता, याचे निर्माण करण्यात आले आहे.
सविस्तरवाचा : गुजरात दौरा : पंतप्रधान नरेंद्र मोदींकडून आरोग्य वनाचे उद्घाटन
- मुंबई - भाषावार प्रांत रचनेमुळे बेळगाव हा महाराष्ट्राचा भाग कर्नाटकमध्ये गेल्याने गेले ६५ वर्ष तो सीमाभाग महाराष्ट्रात समाविष्ट करण्यासाठीचा लढा चालू आहे. या निमित्ताने सीमावासी भागात १ नोव्हेंबर हा काळा दिवस पाळला जातो. 'आजही मराठी बहुल सीमाभाग महाराष्ट्रात आणण्याचे प्रयत्न सुरू आहेत. ज्या दिवशी हा भाग महाराष्ट्रात येईल त्या ऐतिहासिक क्षणापर्यंत आम्ही आपल्यासोबत आहोतच, असा ठाम विश्वास शासनाच्या वतीने आपल्याला देत आहोत', असे शासनाचे सीमाभाग समन्वयक मंत्री एकनाथ शिंदे आणि छगन भुजबळ यांनी म्हटले आहे. एकनाथ शिंदे आणि छगन भुजबळ यांनी सीमाभागातल्या जनतेसाठी पत्र लिहून आपल्या भावना व्यक्त केल्या आहेत. त्या पत्रात त्यांनी आपल्या भावना व्यक्त केल्या आहेत.
सविस्तर वाचा : महाराष्ट्र-कर्नाटक सीमा वाद : तो ऐतिहासिक क्षण येईपर्यंत आम्ही आपल्यासोबत; सीमाभाग समन्वय मंत्र्यांचे पत्र
- मुंबई- एकतर्फी प्रेमातून अभिनेत्री मालवी मल्होत्रावर चाकू हल्ला करणाऱ्या आरोपीला वर्सोवा पोलिसांनी अटक केली आहे. मुंबईतील वर्सोवा परिसरात मालवी मल्होत्रा हिच्यावर चाकू हल्ला केल्यानंतर आरोपी योगेश कुमार महिपाल सिंग हा वसईमध्ये पळून गेलेला होता. या दरम्यान त्याच्या वाहनाला अपघात झाला. त्याला स्थानिक रुग्णालयात दाखल करण्यात आले होते. रुग्णालयातून डिस्चार्ज मिळाल्यानंतर योगेश कुमारला अटक करण्यात आली. या आरोपीची रवानगी 2 नोव्हेंबरपर्यंत पोलिस कोठडीत करण्यात आली आहे.
सविस्तर वाचा : अभिनेत्री मालवी मल्होत्रावर हल्ला करणाऱ्या आरोपीला अटक, एकतर्फी प्रेमातून केला होता हल्ला
- पॅरिस : फ्रान्सचे पंतप्रधान इमॅन्युएल मॅक्रॉन यांनी गुरुवारी झालेल्या 'इस्लामिस्ट दहशतवादी हल्ल्याचा' निषेध व्यक्त केला. यासोबतच त्यांनी दहशतवादाला तोंड देण्यासाठी नवी रणनीती आखण्याची शपथ घेतली.
सविस्तर वाचा : दहशतवादाला तोंड देण्यासाठी नवी रणनीती आखणार; फ्रान्सच्या पंतप्रधानांनी घेतली शपथ
