तिरूमाला - तिरुपतीचे पोलीस अधीक्षक अवुला रमेश रेड्डी यांनी बुधवारी तिरुमला येथील बालाजी मंदिराची पाहणी केली. येत्या ८ जूनपासून केंद्रीय गृहमंत्रालयाने धार्मिक देवस्थाने सुरू करण्याची परवानगी दिली आहे. त्या पार्श्वभूमीवर तिरुमाला तिरुपती देवस्थानाने मंदिर सुरू करण्याची तयारी केली आहे. या तयारीचा आढावा अवुला रेड्डी यांनी घेतला.
गृह मंत्रालयाच्या परवानगीने कोविड-१९ च्या उपाययोजना करून मंदिर सुरू करण्यात येणार आहे. त्यासाठी देवस्थानने सर्व तयारी केली आहे. भाविकांना उभे राहण्यासाठी ठिकाणे निश्चित केली असून मंदिर परिसरात त्यांची आरोग्य तपासणी देखील केली जाणार आहे, असे पोलीस अधिक्षक रेड्डी यांनी सांगितले.
कोरोना प्रादुर्भावामुळे नागरिकांना स्वत:ची काळजी घेण्याची सवय लागलेलीच आहे. तरी देखील आलेल्या भाविकांना कशा प्रकारे हाताळले जावे यासाठी मंदिर प्रशासनाच्या कर्मचाऱयांना प्रशिक्षण दिले जाणार आहे. मंदिर प्रशासनाने केलेल्या पूर्वतयारीबाबत समाधानी असल्याचे रेड्डी यांनी सांगितले.
मंदिर परिसरात पूजा साहित्याची विक्री करणाऱया काही मोजक्या दुकानदारांना दुकाने सुरू करण्याची परवानगी देण्यात आली आहे. त्यांना देखील सुरक्षेच्या उपाययोजना करणे बंधनकारक करण्यात आले आहे, असे रेड्डी यांनी सांगितले.
