मंगळुरू - एका स्थानिक न्यायालयाने, कुख्यात सीरियल किलर 'सायनाईड' मोहनला एका तरुणीच्या हत्येप्रकरणी दोषी ठरवले आहे. केरळमधील कासारगोडा येथे एका तरुणीवर अत्याचार करुन, तिला सायनाईड पाजून मोहनने तिची हत्या केली होती. याप्रकरणी २४ जूनला शिक्षा सुनावण्यात येण्याची शक्यता आहे.
मोहनविरोधात दाखल असलेला हा २०वा खुनाचा गुन्हा आहे. कित्येक तरुणींना आणि महिलांना मैत्रीच्या जाळ्यात अडकवून, त्याने त्यांच्यावर अत्याचार केले होते. त्यानंतर सायनाईड पाजून तो त्यांची हत्या करत असे. त्यामुळेच त्याला 'सायनाईड मोहन' असे नाव मिळाले होते.
या प्रकरणातील तरुणी कासारगोडमधील एका महिला वसतीगृहात ती आचारी म्हणून काम करत होती. २००९ला तिची मोहनशी ओळख झाली. त्यानंतर आपल्या प्रेमाच्या जाळ्यात तिला अडकवून मोहनने तिला लग्नाचे वचनही दिले होते. ८ जुलै २००९ला ती मंदिरात जाते सांगून आपल्या घरातून पळून गेली. त्यानंतर मोहन तिला कर्नाटकमधील बंगळुरूला घेऊन गेला. तिच्या घरच्यांनी चौकशीसाठी फोन केला असता, तिने आपण लग्न केल्याचे सांगितले, तसेच आपण लवकरच घरी येऊ असेही सांगितले.
त्यानंतर बंगळुरूमधील एका हॉटेलमध्ये ते दोघे राहिले. मोहनने दुसऱ्या दिवशी तिला आपले सर्व दागिने हॉटेलमधील रुममध्येच ठेवण्यास सांगितले. त्यानंतर तो तिला बस स्थानकावर घेऊन गेला, आणि गर्भनिरोधक गोळी आहे असे सांगून तिला त्याने सायनाईडची गोळी दिली. ती गोळी खाल्ल्यानंतर बस स्थानकामध्येच ती कोसळली. स्थानकावर हजर असलेल्या पोलीसाने तिला तातडीने जवळच्या रुग्णालयात नेले, मात्र त्यापूर्वीच तिचा मृत्यू झाला होता.
त्यानंतर, या तरुणीच्या बहिणीने मोहनची ओळख पटवल्यानंतर २००९च्या ऑक्टोबरमध्ये मोहनला अटक करण्यात आली होती.
हेही वाचा : श्रीनगर जिल्ह्यात सुरक्षा दलाचे जवान अन् दहशतवाद्यांमध्ये चकमक
