नवी दिल्ली - लोकसभा निवडणुकीतील दारुण पराभवानंतर काँग्रेमध्ये पराभवाची समिक्षा करण्याऐवजी राजीनामा नाट्यालाच वेग आला आहे. काँग्रेस अध्यक्ष राहुल गांधींनी प्रथम राजीनामा देऊन याची सुरूवात केली. त्यानंतर देशातील अनेक नेत्यांमध्ये राजीनामा देण्याची चढाओढच लागली. आतापर्यंत तब्बल १३ नेत्यांनी आपल्या पदांचे राजीनामे सादर केले आहे.
लोकसभा निवडणुकीत काँग्रेसला देशभरात केवळ ५२ जागांवर विजय मिळवता आला. २०१४ च्या निवडणुकांपेक्षा यावेळी केवळ ८ जागा जास्त जिंकता आल्या. या पराभवाची जबाबदारी स्वीकारत काँग्रेसचे राष्ट्रीय अध्यक्ष राहुल गांधी यांनी अध्यक्षपदाचा राजीनामा काँग्रेस कार्यकारीणीकडे सोपवला. मात्र, कार्यकारीणीने त्यांचा राजीनामा स्वीकारला नाही.
राहुल गांधींच्या राजीनाम्यानंतर देशातील विविध राज्यांच्या काँग्रेस नेत्यांनी राजीनामे सादर केले आहेत. यात महाराष्ट्र काँग्रेस प्रदेशाध्यक्ष अशोक चव्हाण, झारखंडचे अजय कुमार, आसामचे रिपुन बोरा, उत्तर प्रदेशचे राज बब्बर, कमलनाथ, पंजाबचे सुनिल जाखड आदींनी राजीनामे पक्षाकडे सोपवले.
काँग्रेसचा हा पराभव नेत्यांच्या जिव्हारी लागणारा होता. मात्र, याची समिक्षा करण्याऐवजी नेत्यांनी राजीनामानाट्य सुरू केले आहे. त्यामुळे राहुल गांधींनी सुरू केलेल्या या राजीनामा सत्राला वेगळेच वळण लागले आहे. देशात पुन्हा एकदा काँग्रेस उभी करण्यासाठी काँग्रेसपुढे आव्हान असताना नेत्यांनी राजीनामे दिल्याने काँग्रेस चांगलीच अडचणीत येण्याची शक्यता आहे.
