मुंबई - विधानसभा निवडणुकीच्या प्रचारासाठी पंतप्रधान नरेंद्र मोदी महाराष्ट्रामध्ये आहेत. आज (गुरुवारी) बीडमधील परळी, सातारा आणि पुण्यामध्ये ते महायुतीच्या उमेदवारांच्या प्रचारासाठी सभा घेणार आहेत. केंद्रात नरेंद्र आणि राज्यामध्ये देवेंद्र, अशी घोषणा देऊन भाजपकडून मतदारांना पुन्हा देवेंद्र फडणवीस यांच्या नेतृत्त्वाला मतदान करण्याचे आवाहन करण्यात येत आहे.
साताऱ्यामध्ये राष्ट्रवादी काँग्रेसचे खासदार उदयनराजे भोसले यांनी भाजप प्रवेश केल्यामुळे तेथे विधानसभेसह लोकसभा पोटनिवडणूक होणार आहे. त्यामुळे मोदी येथे भाजप उमेदवार उदयनराजे यांचाही प्रचार करणार आहेत. उदयनराजेंविरोधात राष्ट्रवादीकडून श्रीनिवास पाटील लढणार आहेत. तर बीडमधील परळी मतदारसंघातून पंकजा मुंडे निवडणूक लढवत आहेत. त्यांच्या प्रचारासाठी मोदींची सभा होणार आहे. याबरोबरच पुणे मतदार संघातील महायुतीच्या उमेदवारांसाठी मोदींची सभा होणार आहे.
हेही वाचा - निवडणूक काळात 'एक्झिट पोल' जाहीर करण्यास निवडणूक आयोगाची मनाई
परळीत मोदी सभा घेतात खरेतर हे जिल्ह्याचे भाग्य आहे. भविष्यात आम्ही बीड जिल्ह्याच्या विकासाचे अनेक प्रकल्प पंतप्रधानांकडून मार्गी लावून घेऊ शकतो. मात्र, विरोधकांना मोदी यांच्या सभेमुळे धडकी भरली आहे. आता त्यांना काहीही भास होत असल्याची टीका पंकजा मुंडे यांनी धनंजय मुंडेंवर केली आहे. सोमवारी आयोजित पत्रकार परिषदेत त्या बोलत होत्या.
मोदींच्या सभेच्या पार्श्वभुमीवर सातारा शहरातील वाहतुकीत बदल करण्यात आला आहे. सैनिक स्कूल परिसरातील सर्व रस्ते वाहतुकीसाठी बंद ठेवले जाणार आहेत. पर्यायी मार्ग खुले राहणार असून त्याचा नागरिकांना वापर करावा, असे आवाहन करण्यात आले आहे. दरम्यान, सकाळी 6 ते रात्री 8 वाजेपर्यंत रस्ते वाहतुकीसाठी बंद राहणार आहेत.
हेही वाचा - पुण्यात नगरसेवक विशाल धनवडे यांच्यासह २०० शिवसैनिक पदाधिकाऱ्यांचे सामूहिक राजीनामे
महाराष्ट्रात विधानसभा निवडणुकीमध्ये स्पष्ट बहुमत मिळवण्यासाठी भाजपने कंबर कसली आहे. बऱ्याच ठिकाणी एकतर्फी लढती असल्याचा प्रचार केला जात आहे. तरीही देवेंद्र-नरेंद्र प्रचारावर अधिकाधिक भर देत आहेत. पहिली सभा १३ ऑक्टोबरला उत्तर महाराष्ट्रातील जळगावमध्ये झाली. प्रचारादरम्यान काश्मीरचे ३७० कलम हटवल्याचा पुनरुच्चार मोदींकडून करण्यात येत आहे. तर अकोल्यातील सभेत काँग्रेस राष्ट्रवादीला भष्ट्रवादी युती म्हणुन संबोधले.
राज्यातील विधानसभेच्या २८८ जागांपैकी भाजप १६४ जागांवर तर, शिवसेना १२४ जागांवर लढत आहेत. १९ ऑक्टोबर प्रचाराचा शेवटचा दिवस आहे. २१ ऑक्टोबरला मतदान होईल. २४ ऑक्टोबला मतमोजणी आहे. २०१४ च्या निवडणुकीत भाजप-शिवसेनेने स्वतंत्रपणे निवडणूक लढवली होती. त्यात भाजपने १२२ आणि शिवसेनेने ६३ जागा जिंकल्या होत्या.
हेही वाचा - काँग्रेस, राष्ट्रवादी ही भ्रष्टवादी आघाडी - पंतप्रधान मोदी
महाराष्ट्राबरोबर हरियाणा राज्याचीही निवडणूक आहे. त्यामुळे हरियाणामध्येही भाजप उमेदरावारांच्या प्रचारामध्ये मोदी व्यस्त आहेत. शेतकऱ्यांच्या वाट्याचे पाणी पाकिस्तानला जाऊ देणार नाही, अशी घोषणा मोदींनी केली.
