नवी दिल्ली - झारखंडमधील देवघर जिल्हा हा हिंदूंसाठी एक पवित्र तीर्थक्षेत्र आहे. या ठिकाणी मोठ्या संख्येने भाविक भेट देतात. त्यामुळे येथे बरेच प्लास्टिक जमा होते. देवघरला प्लास्टिक मुक्त करण्याचा विडा येथील पुजारी महेश पंडित यांनी उचलला आहे. ते लोकांना प्लास्टिक पर्यावरणास हानिकारक असून त्याचे गंभीर व भयावह परिणाम सांगतात आणि प्लास्टिक न वापरण्याचे आवाहन करतात.
झारखंड सरकारने 2017 मध्ये प्लास्टिकच्या वापरावर बंदी घातली. परंतु, बंदी असूनही स्थानिकांनी प्लास्टिकचा वापर सुरूच ठेवला. त्यामुळे पुजारी महेश पंडित यांनी स्वत: देवघरला प्लास्टिकमुक्त करण्यासाठी पुढाकार घेतला. शहर स्वच्छ करण्यासाठी त्यांनी एक मोहीम सुरू केली. त्यांच्या मोहिमेमुळे देवघरमध्ये वापरल्या जाणार्‍या प्लास्टिकचा वापर पूर्वीपेक्षा खूपच कमी झाला आहे.
सरकारच्या मदतीने आपण प्लास्टिकचा वापर थांबवू शकतो. प्लास्टिकचा वापर करणाऱ्या लोकांवर सरकारने कडक कारवाई केली पाहिजे, असे ते 'ईटीव्ही भारत'शी बोलताना म्हणाले.
हेही वाचा - जामिया विद्यापीठातील विद्यार्थ्यांचं आंदोलन सुरूच, सरकार आवाज दाबत असल्याचा केला आरोप
पुजारी महेश पंडित यांनी आपल्या मोटरसायकलवर प्लास्टिकमुक्तीची एक घोषणा लिहिली आहे. ते दुचाकीने शहराच्या विविध भागात फिरतात आणि लोकांना जागरूक करतात. महेश यांचे या उपक्रमाबद्दल सर्वत्र कौतुक होत आहे.
हेही वाचा - स्वच्छ भारत - अजूनही दूर राहिलेले स्वप्न?
प्लास्टिक मुक्तीसाठी देशभर प्रयत्न सुरू आहेत. अनेक ठिकाणी प्लास्टिकच्या वापरावर निर्बंध घालण्यासाठी प्रयत्न केले जात आहेत. मात्र, लोक प्लास्टिकचा सर्रास वापर करतात. महेश यांनी अशा लोकांपुढे एक चांगले उदाहरण ठेवले आहे.
