प्रजासत्ताक दिनाच्या पार्श्वभूमीवर दिल्लीत तीन संशयित दहशतवादी ताब्यात, शहरात 'हाय अलर्ट'

मागील गुरुवारी दिल्ली पोलिसांच्या विशेष पथकाने इसिस संघटनेशी संबधीत तीन संशयित दहशतवाद्यांना अटक केली. त्यानंतर शहरातील सुरक्षा व्यवस्था वाढवण्यात आली आहे.

नवी दिल्ली - राजधानीमध्ये दोन आठवड्यांवर आलेल्या प्रजासत्ताक दिनाची जोरदार तयारी सुरू आहे. विधानसभा निवडणुकीसही एक महिन्यापेक्षा कमी वेळ राहिला आहे. अशातच दिल्लीमध्ये इसिस संघटनेशी संबधित तीन दहशतवाद्यांना अटक करण्यात आल्याने सुरक्षा व्यवस्थेवर प्रश्नचिन्ह ऊभे राहिले आहे.

पोलीस आयुक्त अमूल्य पटनायक यांनी पोलिसांना सतर्कतेचा इशारा दिला आहे. मागील गुरुवारी दिल्ली पोलिसांच्या विशेष पथकाने इसिस संघटनेशी संबधित तीन संशयित दहशतवाद्यांना अटक केली. दिल्लीतील वजीराबाद भागात झालेल्या चकमकीत पोलिसांनी तिघांना अटक केली, त्यांच्याकडून तीन पिस्तूलही ताब्यात घेतले आहेत.

दिल्लीत सुरक्षा व्यवस्थेत वाढ

संशयीत आरोपी लवकरच उत्तरप्रदेश आणि दिल्लीत घातपाती कारवाया घडवून आणणार होते, अशी माहिती तपासात पुढे आली आहे. याची तयारी करण्यासाठी तिघेजण दिल्लीमध्ये आले होते. मात्र, कट आखणारा सूत्रधार अजूनही पोलिसांना सापडला नाही, त्यामुळे पोलीस दल कामाला लागले आहे. सायबर कॅफे, हॉटेल, भाडेकरू, गेस्ट हाऊसवर बारकाईने लक्ष ठेवण्याचे आदेश पोलीस आयुक्त अमूल्य पटनायक यांनी दिले आहेत. याबरोबरच बाजार, मॉल, धार्मिक स्थळे, ऐतिहासिक स्थळांबरोबरच गर्दीच्या ठिकाणी कडक सुरक्षा व्यवस्था ठेवण्यात आली आहे. याशिवाय शहराच्या सीमारेषेवरही तपास मोहीम सुरू करण्यात आली आहे. सर्व सुरक्षा दलांना सतर्कतेचा इशारा देण्यात आला आहे.