देहरादून (उत्तराखंड) - केदारनाथ, बद्रीनाथ, यमुनोत्री, गंगोत्री या चार हिंदू मंदिरांच्या प्रतिष्ठित 'चार धाम' यात्रेला यावर्षी कोरोना विषाणुच्या प्रादुर्भावामुळे परवानगी नाकारण्यात आली आहे. मात्र मंदिराच्या पूजेच्या परंपरा कायम ठेवण्याचा निर्णय उत्तराखंड सरकारने घेतला आहे. भाविकांशिवाय या मंदिरांमध्ये पारंपरिक विधी आणि पूजा करण्याला सरकारने परवानगी दिली आहे.
सरकारने मंत्रोच्चार, प्रार्थना, आरती यासह धार्मिक पूजा आणि अभिषेक करण्याचा ऑडिओ रेकॉर्डिंग करण्याचा निर्णय घेतला आहे. ऑडिओच्या माध्यमातून भाविकांना ते ऑनलाईन उपलब्ध करुन दिले जाईल. या ऑनलाईन पूजेसाठी भाविक ऑनलाइन देणगी व नैवेद्य देखील देऊ शकतील.
केदारनाथ धाममधील महाभिषेकाचे शुल्क ८ हजार रुपये, रुद्राभिषेक साडेसात हजार रुपये, लहान रुद्राभिषेक सहा हजार रुपये आणि सौंदसपचाराचे शुल्क चार हजार आहे. तर बद्रीनाथ धाम येथे महाभिषेकाचे शुल्क साडेचार हजार रुपये आहे.
कोरोनाने देशभर थैमान घातले आहे. त्याचे सावट चारधाम यात्रेवरदेखील पडले आहे. १६ एप्रिलपासून सुरू होणारी चारधाम यात्रा रद्द करण्यात आली आहे. तसेच तृतीयांश बुकिंगही रद्द करण्यात आली आहे.
लोकांचे आणि मंदीर प्रशासनाचे नुकसान होऊ नये यासाठी उत्तराखंड पर्यटन विभागाने भाविकांना त्यांची तिकिटे रद्द न करण्याची विनंती केली आहे. यावर्षी बुक केलेल्या तिकीटांवर येत्या दोन वर्षात त्यांना कधीही तीर्थयात्रेत येण्याची परवानगी देण्यात आली आहे.
चार धाम यात्रेने २०१९ मध्ये सर्वाधिक ३२ लाख भाविकांची नोंद केली होती आणि यंदादेखील मोठ्या प्रमाणात लोक या यात्रेसाठी येतील असे अपेक्षित होते. मात्र, कोरोनामुळे यात्रा रद्द करण्यात आली आहे.
