इम्फाळ - मनिपूर राज्याचे अतिरिक्त पोलीस महासंचालक(कायदा-सुव्यवस्था) अरविंद कुमार यांनी आपल्या कार्यालयात बसलेले असताना स्वत:वर गोळी झाडून घेतली. जखमी अवस्थेत त्यांना तत्काळ रुग्णालयात दाखल करण्यात आले आहे. मात्र, त्यांची प्रकृती गंभीर असल्याची माहिती समोर येत आहे.
अरविंद कुमार हे 1992 च्या तुकडीतील बिहार केडरचे आयपीएस अधिकारी आहेत. स्वत:कडील सर्व्हिस रिव्हॉल्वरमधून त्यांनी गोळी झाडून घेतली. पोलीस मुख्यालयातील 2 मनिपूर रायफल्स कॉम्पलेक्समधील आपल्या कक्षात बसले असताना ही घटना घडली. यानंतर त्यांना तत्काळ इम्फाळमधील खासगी रुग्णालयात दाखल करण्यात आले. सध्या त्यांच्यावर अतिदक्षता विभागात उपचार सुरु असल्याचे एका अधिकाऱ्याने सांगितले.
कुमार यांनी गोळी का झाडून घेतली? याचे कारण अद्याप अस्पष्ट आहे. घटनेनंतर मनिपूरचे पोलीस महासंचालक एल. एम खऊते आणि मुख्य सचिव जे. सुरेश यांनी रुग्णालयात धाव घेतली. कुमार यांची प्रकृती गंभीर आहे, मात्र, ते उपचारास प्रतिसाद देत आहेत, असे मुख्य सचिवांनी सांगितले.
प्रकृतीत सुधारणा झाल्यानंतर त्यांना दिल्लीला हलविण्यात येणार आहे. याप्रकरणी चौकशी करण्यात येणार असल्याचे जे. सुरेश यांनी सांगितले. अरविंद कुमार यांनी दिल्लीत गुप्तचर विभागात उपसंचालक पदाचा कार्यभार सांभाळला आहे. तसेच बिहार केडरमध्ये बदली करण्यासाठी त्यांनी सरकारकडे मागणी केली होती.
