रांची - आपल्या देशात कोणताही मोठा समारंभ असला, की त्यासोबत लोकांचे जेवण हे अपरिहार्यच असते. मोठ्या प्रमाणात लोकांना जेवण द्यायचे असेल, तर कमी खर्च व्हावा म्हणून प्लास्टिक किंवा थर्माकॉलच्या थाळ्या वापरणे आता अगदी सामान्य झाले आहे. मात्र हेच प्लास्टिक आपल्यासाठी धोकादायक ठरत आहे.
देशात सुरू असलेल्या प्लास्टिकविरोधी लढाईमध्ये, झारखंडच्या जमशेदपूरजवळील जुगसलाई नगर परिषदेचाही मोठा वाटा आहे. स्वयंसेवकांच्या ३७ समूहांच्या मदतीने, या नगर परिषदेने भांड्यांची बँक सुरू केली आहे. या विशेष बँकेच्या माध्यमातून, लोकांना समारंभांसाठी अगदी नाममात्र किंमतीमध्ये स्टीलची भांडी भाड्याने देण्यात येतात.
शाकाहारी आणि मांसाहारी या दोन्ही प्रकारच्या लोकांचा विचार करून, ही बँक दोन्ही प्रकारचे खाद्यपदार्थ बनवण्यासाठी वेगवेगळी भांडी पुरवतात. जुगसलाई नगर परिषदेने या बँकेसाठी विशेष असा मोबाईल नंबरही सुरू केला आहे. या नंबरच्या माध्यमातून लोक फोनवर आणि व्हॉट्सअॅपवरही या बँकेच्या संपर्कात राहतात.
हेही वाचा : नो टू सिंगल यूज प्लास्टिक : पंतप्रधानांकडून पारितोषिक मिळालेले 'हे' गाव आता होतंय प्लास्टिकमुक्त
