बंगळुरू - दोन महिन्यांपूर्वी 'चांद्रयान-२' हे चंद्रावर सॉफ्ट लँडिंग करण्यात अयशस्वी ठरले होते. मात्र त्यामुळे इस्रो खचून गेले नाही. पुढील वर्षी नोव्हेंबरमध्ये चंद्रावर सॉफ्ट लँडिंग करण्याचा इस्रो पुन्हा प्रयत्न करण्याची शक्यता वर्तवण्यात येत आहे.
भारतीय अवकाश संशोधन केंद्राने (इस्रो) एका उच्चस्तरीय समितीची स्थापना केली आहे. तिरुवअनंतपुरम येथील विक्रम साराभाई अवकाश केंद्राचे संचालक एस. सोमनाथ हे या समितीचे अध्यक्ष असतील. विक्रम साराभाई अवकाश केंद्र हे इस्रोच्या सर्व अवकाश यात्रांसाठी लाँचिंग प्रक्रियेमध्ये मुख्य कामगिरी बजावते. त्यांच्यावरच आता 'चांद्रयान-३' चा आराखडा तयार करण्याची जबाबदारी असणार आहे. इस्रोच्या एका वरिष्ठ अधिकाऱ्याने दिलेल्या माहितीनुसार, पुढील एका वर्षाच्या आत हा आराखडा तयार करण्याचे निर्देश या समितीला दिले गेले आहेत.
'चांद्रयान-३'च्या लाँचिंगसाठी पुढील नोव्हेंबरमध्ये चांगली संधी आहे. यावेळी रोव्हर, लँडर आणि लँडिंग ऑपरेशन्सच्या बाबत अधिक काळजी घेण्यात येईल. तसेच 'चांद्रयान-२'च्या वेळी ज्या कमतरता आढळल्या होत्या, त्याही टाळण्यात येतील, अशी माहिती बंगळुरूमधील सूत्रांकडून मिळाली आहे.
सात सप्टेंबरला इस्रोने लाँच केलेले, 'चांद्रयान-२'चे विक्रम लँडर चंद्रावर कोसळले होते. चंद्रावर हार्डलँडिंग झाल्यानंतर विक्रम लँडरशी संपर्क तुटला होता. यानंतर सतत १४ दिवस संपर्क साधण्याचा प्रयत्न करण्यात आला. मात्र, तो असफल ठरला.
विक्रम लँडरशी संपर्क तुटल्याची कारणे शोधण्यासाठी इस्रोच्या लिक्विड प्रोपल्शन सिस्टम केंद्राचे संचालक व्ही. नारायण यांच्या अध्यक्षतेखाली एक समिती स्थापन करण्यात आली होती. या समितीने आपला अहवाल तयार करून अवकाश आयोगाकडे दिला आहे. पंतप्रधान नरेंद्र मोदी यांच्या मान्यतेनंतर हा अहवाल सार्वजनिक करण्यात येणार असल्याची माहिती एका अधिकाऱ्याने दिली आहे.
हेही वाचा : आईन्स्टाईनच्या सिद्धांताला आव्हान देणारे महान गणित तज्ज्ञ डॉ. वशिष्ठ सिंह यांचे निधन
