हैदराबाद - शेजारील इमारतीची भिंत घरावर पडल्याने हैदराबादमधील एका युवकाचा मृत्यू झाला आहे. ही घटना रविवारी सांयकाळी घडली. रितेश (वय 20) असे मृत तरुणाचे नाव आहे.
मुसळधार पावसामुळे येथील मंगळघाट परिसरातील रितेशच्या घरावर शेजारील इमारतीची भिंत कोसळली. यावेळी रितेश आपल्या घरात झोपलेला होता. भिंत कोसळल्याने त्याच्या डोक्याला गंभीर दुखापत झाली. त्यावर त्याला तातडीने जवळच्या रुग्णालयात नेण्यात आले, मात्र, डॉक्टरांनी त्याला मृत घोषित केले.
मृतदेह शवविच्छेदनासाठी शासकीय रुग्णालयात पाठवण्यात आला आहे. पोलिसांनी शेजाऱ्यांवर भारतीय दंड संहिता (आयपीसी) च्या कलम 304-ए अंतर्गत गुन्हा दाखल केला आहे.
