चंदीगड - हरियाणा विधानसभेसाठी राज्यभरामध्ये आज (सोमवारी) सकाळी ७ वाजल्यापासून मतदानाला सुरुवात झाली आहे. संध्याकाळी ६ वाजेपर्यंत मतदान चालणार आहे. हरियाणा विधानसभेच्या ९० जागांसाठी एकूण १ हजार १६९ उमेदवार आपले नशिब आजमावत आहेत. यामध्ये १ हजार ६४ पुरुष आणि १०५ महिला उभ्या आहेत.
LIVE UPDATE:
हरियाणामध्ये 5:30 वाजेपर्यंत 61.29 टक्के मतदान
हरियाणामध्ये दुपारी 3:30 वाजेपर्यंत 50.59 टक्के मतदान
हरियाणामध्ये दुपारी २ वाजपर्यंत ३७.१२ टक्के मतदान
उचान कला येथे जेजेपी पक्षाचे उमेदवार दुष्यंत चौटाला यांनी बोगस मतदान होत असल्याचा आरोप केला. त्यावरून बीजेपी आणि जेजेपी कार्यकर्त्यांमध्ये झटापट झाली. पोलीस अधिक्षक घटनास्थळी उपस्थित असून निमलष्करी दलही पाचारण करण्यात आले आहे.
दादरी विधानसभा मतदारसंघातील दातौली गावातील लोकांनी पाण्याच्या समस्येमुळे निवडणुकीवर बहिष्कार घातला. प्रशासनाचं आमच्याकडे लक्ष नसल्याचं म्हणत पैतावार गावानेही निवडणुकीवर बहिष्कार घातला आहे.
नूह: हरियाणातील फिरोजपूर झिरका विधानसभा मतदारसंघातील मलहाका गावामध्ये काँग्रेस आणि भाजप समर्थकामध्ये तुंबळ हाणामारी. १२८ नंबरच्या बूथवर लाठी काठ्यांनी हाणामारी, अनेकजण जखमी झाल्याची माहिती. यावेळी गोळीबार झाल्याचीही माहिती मिळत आहे.
ईव्हीएममधून मिळणारं प्रत्येक मत भाजपचं, असे भाजपचे उमेदवार बक्षिस सिंह म्हणत असल्याचा व्हिडिओ व्हायरल झाला आहे. याप्रकरणी राज्याच्या मुख्य निवडणूक आयोगाने त्यांना कारणे दाखवा नोटीस जारी केली आहे. व्हिडिओ बनावट असल्याचा बक्षिस सिंह यांनी म्हटले आहे.
माजी हॉकी कप्तान संदीप सिंह यांनी कुरुक्षेत्र येथे मतदान केले. संदीप सिंह पिहोवा येथून भाजपच्या तिकीटावर उभे आहेत.
उचाना कला मतदार संघातून उभ्या असेलल्या भाजपच्या उमेदवार प्रेमलता सिंह यांनी बजावला मतदानाचा हक्क. तुमच्या परिसराच्या विकासासाठी मतदान करण्याचं नागरिकांना आवाहन केले.
जननायक जनता पक्षाचे नेते दुष्यंत चौटाला ट्रक्टरमध्ये बसून सहकुटुंब सिरसा येथे मतदानाला आले.
हरियाणा विधानसभा निवडणुकीसाठी सकाळी ११.०० वाजेपर्यंत २२.३८ टक्के मतदान झाले.
सकाळी ९ वाजेपर्यंत ८.७३ टक्के मतदान झाले आहे.
हरियाणाचे माजी मुख्यमंत्री भुपेंद्र हुडा यांनी पूर्ण बहुमताने काँग्रेसचं सरकार येणार असल्याचा दावा केला आहे. म्हणाले आमची लढाई फक्त भाजपशी.
हरियाणाचे मुख्यमंत्री मनोहरलाल खट्टर यांनी बजावला मतदानाचा हक्क. मतदान करुन कर्तव्याचे पालन करण्याचे नागरिकांना केले आवाहन.
टिकटॉक स्टार सोनाली फोगट यांनी बजावला मतदानाचा हक्क. त्या आदनपूर मतदार संघातून निवडणूक लढवत आहेत. त्यांच्या विरोधात काँग्रस नेते कुलदिप बिष्णोई उभे आहेत.
मुख्यमंत्री मनोहरलाल खट्टर यांनी मतदान करण्याचे आवाहन नागरिकांना केले. मतदान करण्यासाठी ते चंदीगडवरुन कर्नालला रेल्वेने गेले.
गुरुग्राममधील बदशहापूर ईव्हीएम मशीन बंद पडल्यामुळे मतदान थांबले.
निमलष्करी दल तैनात -
शांततेत निवडणूक पार पडण्यासाठी राज्यभरामध्ये कडेकोट बंदोबस्त ठेवण्यात आला आहे. निमलष्करी दलाच्या १३० तुकड्या राज्यामध्ये तैनात केल्या आहेत. संवदेनशील मतदान केंद्रावर अतिरिक्त सुरक्षा ठेवण्यात आली आहे. हरियाणामधील १० हजार ३०९ ठिकाणांवर १९ हजार ५७८ मतदान केंद्रे आहेत. यापैकी ८३ मतदान केंद्र अति संवेदनशील आणि २ हजार ९२३ केंद्र धोकादायक आहेत.
आज मतदान, तर २४ तारखेला निकाल
विधानसभा निवडणुकीमध्ये १ कोटी ८३ लाख ९० हजार ५२५ मतदार मतदानाचा हक्क बजावणार आहेत. त्यापैकी ९८ लाख ७८ हजार ४२ मतदार पुरुष आहेत, तर ८५ लाख १२ हजार महिला मतदार आहेत. २५२ ट्रान्सजेंडर मतदारही मतदानाचा हक्क बजावणार आहेत.
कोणत्या पक्षाचे किती उमेदवार ?
भाजपचे ९०, बहुजन समाज पक्ष ८७, सीपीआय ४, सीपीआयएम ७, काँग्रेस ९०, राष्ट्रवादी काँग्रेस १, लोकदल ८१, जननायक जनता पक्ष ८७ आणि अपक्ष ३७५ उमेदवार निवडणुकीला उभे आहेत.
राज्यामध्ये आचारसंहीतेच्या उल्लंघनासंबधी आत्तापर्यंत ६ हजार ८८४ तक्रारी मोबाईल अॅपच्या माध्यमातून दाखल झाल्या आहेत, असे निवडणूक अधिकारी इंद्रजित सिंह यांनी सांगितले. यातील अनेक तक्रारी सोडवण्यात आल्या असून ३३ तक्रारींवर चौकशी सुरू आहे.
