पटना - नेपाळचा तराई भाग आणि उत्तर बिहारमध्ये बरसलेल्या जोरदार पावसामुळे राज्यातील पूर परिस्थिती गंभीर झाली आहे. पूरामुळे मृतांचा आकडा दिवसेंदिवस वाढत आहे. राज्यातील १२ जिल्हे पुरामुळे प्रभावीत झाले असून यामध्ये २५ लाख लोकांना पुराचा फटका बसला आहे. आत्तापर्यंत पुरामध्ये ७३ लोकांचा मृत्यू झाला आहे.
मोतीहारी जिल्ह्यात २१ लोकांचा मृत्यू झाला आहे. यामध्ये दोन बालकांचा समावेश आहे. सीतामढी येथे ५ लोकांचा मृत्यू झाला तर शिवहरमध्ये ६ मुलींचा मृत्यू झाला आहे. सुपौल येथेही ५ जणांचा मृत्यू झाला आहे.
सरकारकडून बचाव आणि मदत कार्य युद्ध पातळीवर सुरू आहे. सरकार सर्वांना मदत करत असल्याचा दावा करत असले तरी प्रत्यक्षात परिस्थिती वेगळीच असल्याचे लोक म्हणत आहेत. पुराचा सामना करण्यासाठी स्थापन केलेल्या १९९ मदत केंद्रांमध्ये १ लाख ६६ हजार नागरिकांनी आसरा घेतल्याचे सरकारने सांगितले आहे. १२ जिह्यातील ७८ प्रभागांमधील ५५५ ग्रामपंचायतींमध्ये पाणी शिरले आहे.
पुरग्रस्तांना मदत करण्यास सरकार कमी पडत असल्याचे म्हणत विरोधकांनी नितीश कुमार सरकारला घेरले आहे.
