इंदूर - अवैध उत्खनन करणाऱ्या दोन व्यक्तींवर जिल्हा प्रशासनाने मोठी कारावाई केली आहे. प्रशानाने दोन्ही व्यक्तींना ५.१ कोटीचा दंड ठोठवला आहे. शनिवारी खनिज आणि महसूल विभागाकडून दोन्ही दोषींवर कारवाई झाल्यानंतर जिल्हा प्रशसनाने हा निर्णय घेतला आहे. अतिरिक्त जिल्हाधिकारी डॉ. अभय बेडेकर यांनी दंडासंबंधी आदेश काढले आहेत.
आदेशानुसार, चेतन पटवारी आणि कुणाल पटवारी (दोन्ही रा. बिजालपूर जि. इंदोर) या दोघांना हा दंड ठोठवण्यात आला आहे. मुरुमाचे अवैध उत्खनन आणि कारवाईला आलेल्या अधिकाऱ्यांवर दगडफेक केल्याचा कुणालवर आरोप आहे.
अधिकारी राऊ येथे अवैध उत्खनन थांबवण्यासाठी आले होते. राऊ हे माजी मंत्री जितू पटवारी यांचा मतदारसंघ आहे. ते कुणालचे नातेवाईकही आहेत. कारवाईवेळी अधिकाऱ्यांवर दगडफेक झाली होती. याप्रकरणी जून महिन्यात तेजाजी नगर पोलीस ठाण्यात तक्रार दाखल करण्यात आली होती. त्यानंतर कुणालला अटक करण्यात आली. काल त्याच्यावर ५.१ कोटी रुपयांचा दंड ठोठवण्यात आला.
पोकलेन चालकाने उघड केली आरोपींची नावे
जेव्हा अधिकाऱ्यांनी घटनास्थळावर छापा टाकला, तेव्हा त्यांना नंबर प्लेट नसलेली पोकलेन मशीन आढळली. यावेळी, चेतन पटवारी आणि कुणाल पटवारी हे परवानगी न घेता अवैध उत्खनन करत असल्याची माहिती पोकलेन चालकाने दिली होती. त्यानंतर आरोपींवर कारवाई झाली होती.
याप्रकरणी राज्य सरकारने इंदोर येथील खनिज अधिकारी प्रदीप खन्ना आणि तेजाजी नगर पोलीस ठाण्याचे मुख्य अधिकारी यांची बदली केली आहे. या प्रकरणा नंतर लोकायुक्ताने देखील १ सप्टेंबरला प्रदीप खन्ना यांच्या विविध ठिकाणांवर छापे टाकले आहे.
हेही वाचा- 'दिल्लीत कोरोनाची तिसरी लाट'; आरोग्यमंत्री सत्येंद्र जैन यांची कबुली
