हाथरस (उत्तर प्रदेश)- येथील सामूहिक बलात्कार प्रकरणात सर्वोच्च न्यायालयाने दिलेल्या आदेशानंतर रविवारीपासून पीडित मुलीच्या कुटुंबाची आणि साक्षीदारांची सुरक्षा सीआरपीएफकडे देण्यात आली आहे. कमांडंट मनमोहन सिंग यांच्यासह 239 व्या बटालियन कंपनीच्या 80 सैनिकांनी कुटुंबाच्या सुरक्षेची जबाबदारी स्वीकारली आहे.
आता सीआरपीएफचे जवान पीडित मुलीचे घर आणि आसपासच्या परिसरात तैनात असणार आहे. शनिवारी सीएपीएफच्या कमांडेटने गावात येऊन सुरक्षेचा आढावा घेतला. रोहई गावातील एका शाळेत सीआरपीएफ जवानांच्या राहण्याची व्यवस्था करण्यात आली आहे. यापुर्वी स्थानिक पोलिसांकडे पीडित मुलीच्या परिवाराच्या सुरक्षेची जबाबदारी होती. रविवारपासून पीडित मुलीच्या कुटुंबाच्या सुरक्षेची जबाबदारी सीआरपीएफने स्वीकारली आहे.
काय होते प्रकरण-
उत्तर प्रदेशच्या हाथरसमध्ये एका तरुणीवर सामूहिक अत्याचार झाला होता. या तरुणीवर दिल्लीच्या सफदरगंज रुग्णालयात उपचार सुरू होते. उपचारादरम्यान तिचा मृत्यू झाला. १४ सप्टेंबरला या तरुणीवर अत्याचार झाले होते. ज्यानंतर आरोपींनी तिला मारुन टाकण्याचा प्रयत्नही केला होता. हाथरसमधील चंदपा भागातील एका गावात ही तरुणी राहत होती. १४ सप्टेंबरला आपल्या आईसोबत शेतात चारा आणण्यासाठी गेली असता तिच्यावर चार नराधमांनी सामूहिक अत्याचार केला होता. यानंतर आरोपींनी तिला मारहाण करत, तिला जीवे मारण्याचा प्रयत्न केला. ही तरुणी बेशुद्ध झाल्यानंतर, ती मेली आहे, असे समजून चौघे आरोपी तिला तसेच टाकून निघून गेले होते.
