हैदराबाद - भारतात कोरोना रूग्णांची संख्या ४० लाखांपेक्षा जास्त झाली आहे. तीस लाखांचा टप्पा ओलांडल्यानंतर अवघ्या तेरा दिवसांत ही रूग्णसंख्या ४० लाखांवर गेली आहे. गेल्या २४ तासात ८६ हजार ४३२ रूग्णांची नोंद झाली असून एकूण ३१ लाख ७ हजार २२३ रूग्ण बरे झाले आहेत. लोकांचा बरे होण्याचा दर ७७.२३ टक्क्यांवर गेला आहे. केंद्रीय आरोग्य मंत्रालयाने ही माहिती दिली.
भारतात एकूण ४० लाख २३ हजार १७९ कोरोना रूग्ण असून एकूण मृत्यूंची संख्या ६९ हजार ५६१ एवढी झाली आहे. गेल्या २४ तासात १०८९ जण या व्हायरसला बळी पडले आहेत. २१ दिवसांत भारतातील कोरोना प्रकरणे १० लाखांवरून २० लाखांवर गेली. तर, ३० लाखांचा टप्पा पार करण्यासाठी आणखी १६ दिवस लागले आहेत.
आरोग्य आणि कुटुंब कल्याण मंत्रालयाने सांगितले, की प्रथमच अधिक सोप्या पद्धतीसह, उच्च पातळीवरील चाचण्या सुनिश्चित करण्यासाठी अद्ययावत मार्गदर्शक सूचनांमध्ये 'ऑन-डिमांड' चाचणीची तरतूद करण्यात आली आहे.
ज्यांना चाचणी घेण्याची इच्छा आहे आणि जे देशांमध्ये किंवा राज्यांतून प्रवास करत आहेत त्यांना प्रवेशासाठी निगेटिव्ह चाचणीची आवश्यकता असल्यास 'ऑन डिमांड' चाचणी मिळू शकते. शिवाय, चाचणी सुलभ करण्यासाठी राज्य अधिकार्‍यांना अधिक स्वातंत्र्य आणि लवचिकता दिली आहे, असेही मंत्रालयाने सांगितले.
दिल्ली -
नवी दिल्ली - राजधानीतील कोरोनाची परिस्थिती नियंत्रणात आली आहे. शहरातील मृत्यूचे प्रमाण राष्ट्रीय सरासरीपेक्षा कमी आहे. पॉझिटिव्ह घटनांमध्ये वाढ केवळ चाचणीमुळे झाली आहे. दररोज सुमारे २० हजार ते ४० हजारापर्यंत चाचण्या होत आहेत. ४ सप्टेंबरला दिल्लीत ३६ हजार २१९ चाचण्या घेण्यात आल्या, असे मुख्यमंत्री अरविंद केजरीवाल यांनी सांगितले.
तेलंगणा -
हैदराबाद - तेलंगणाचे अर्थमंत्री हरीश राव यांची कोरोनाची चाचणी पॉझिटिव्ह आली आहे. त्यांनी शनिवारी ट्विटरवरून ही माहिती दिली. मुख्यमंत्री के. चंद्रशेखर राव यांचे पुतणे असलेले हरीश राव यांनी गेल्या काही दिवसांत त्यांच्या संपर्कात आलेल्या सर्वांना स्वत: ला वेगळे ठेऊन कोरोना चाचणी करण्याची विनंती केली आहे.
उत्तर प्रदेश -
अलिगड - तीन कर्मचार्‍यांना कोरोनाची लागण झाल्यामुळे अलिगड जिल्हा न्यायालय शनिवारी बंद करण्यात आले. ५ सप्टेंबरला होणाऱ्या खटल्यांची सुनावणी ३ ऑक्टोबरपर्यंत पुढे ढकलण्यात आली आहे, असे एका प्रवक्त्याने सांगितले. न्यायालय परिस्थितीचा आढावा घेईल आणि ७ सप्टेंबर रोजी भविष्यातील होणाऱ्या कामकाजाबद्दल निर्णय घेईल.
पंजाब -
चंदीगड - पंजाबचे मुख्यमंत्री कॅप्टन अमरिंदर सिंग यांनी कोरोनाची चाचणी निगेटिव्ह आल्यानंतर शनिवारी आपल्या आयसोलेशन कालावधी संपवला. दोन कोरोना पॉझिटिव्ह आमदारांच्या संपर्कात आल्यानंतर मुख्यमंत्र्यांनी स्वत: ला क्वारंटाइन केले होते. सभागृहाच्या एक दिवसीय अधिवेशनात २८ ऑगस्ट रोजी ते आमदारांच्या संपर्कात आले होते.
झारखंड -
काशीपुर - नैनीताल-उधमसिंह नगरचे माजी खासदार केसी सिंह बाबा यांच्यासह २१ जणांची कोरोना चाचणी पॉझिटिव्ह आली आहे. माजी खासदार यांना प्रकृती अस्वास्थ्यामुळे सरकारी रुग्णालयात आणले गेले असता त्यांची चाचणी पझिटिव्ह आली. पुढील उपचारासाठी त्यांना दिल्लीला पाठवण्यात आले आहे.
मध्य प्रदेश -
इंदूर - जिल्हा प्रशासन इंदूरने रुग्णालयांसाठी मार्गदर्शक तत्त्वे जाहीर केली आहेत. रुग्णालयांमध्ये स्वतंत्र युनिव्हर्सल प्रोटेक्शन चार्ज, कोरोना अधिभार, बायोमेडिकल वेस्ट चार्ज रद्द करण्यात आले आहेत. रुग्णालये कोरोना कालावधीपूर्वी खोलीच्या भाड्यात जास्तीत जास्त ४० टक्के अधिक शुल्क आकारण्यास सक्षम असतील. सर्व रुग्णालयांना तपासणी व उपचारासाठीची फी रिसेप्शनमध्ये दाखवावी लागणार आहे.
