मुंबई - काँग्रेसचे वरिष्ठ नेते राधाकृष्ण विखे-पाटील १ जून रोजी भाजपमध्ये अधिकृतरित्या प्रवेश करतील, अशी घोषणा जलसंपदामंत्री गिरीश महाजन यांनी आज (मंगळवार) मुंबई येथे केली आहे. ३० मे रोजी पंतप्रधान नरेंद्र मोदींचा शपथविधी सोहळा पार पडल्यानंतर १ जून रोजी विखे-पाटील भाजप प्रवेश करणार आहेत.
मुंबई येथील महाजन यांच्या निवासस्थानी गिरीश महाजन आणि विखे-पाटील यांची बैठक झाली. बैठकीला अहमदनगर लोकसभा मतदारसंघातून निवडूण आलेले खासदार सुजय विखे-पाटीलही उपस्थित होते. लोकसभा निवडणुकीच्या निकालाआधीच २५ एप्रिलला विखे-पाटील यांनी राहुल गांधीकडे राजीनामा दिला होता. राहुल गांधी यांनीही त्यांचा राजीनामा मंजूर केला होता. त्यामुळे पुत्र सुजयच्या भाजप प्रवेशानंतर राधाकृष्ण विखे-पाटील भाजप प्रवेशाच्या बातम्या येत होत्या. विखे-पाटलांनीही याबाबत वेळोवेळी संकेत दिले होते. आज याबाबत गिरीश महाजन यांनी अधिकृत घोषणा केली आहे.
