नवी दिल्ली - ‘ऑनलाईन तिकिट बुकिंग प्लॅटफॉर्म बुकमायशो’ने त्यांच्या 270 कर्मचाऱ्यांना कामावरून कमी केले किंवा अनिश्चित काळासाठी रजेवर पाठवले आहे. कोरोना विषाणू प्रसाराच्या पार्श्वभूमीवर लागू असलेल्या लॉकडाऊनमुळे येत्या काही महिन्यात ऑनलाईन तिकिटे बुक करण्याचे प्रमाण कमी होईल आणि यामुळे कंपनीचे उत्पन्न मोठ्या प्रमाणात कमी होईल, अशी शक्यता आहे. यामुळे कंपनीने हा निर्णय घेतला आहे.
ओला, उबेर, झोमॅटो, स्विगी अशा तंत्रज्ञानाच्या आधारावर चालणाऱ्या अनेक व्यावसायिक कंपन्यांचीही अशीच स्थिती आहे. या कंपन्यांनी त्यांच्या शेकडो कर्मचाऱ्यांना मागील काही आठवड्यात कामावरून कमी केले आहे. सध्या त्यांच्या व्यवसायासाठी अनिश्चित वातावरण निर्माण झाले असून त्यांच्या उत्पन्नात मोठी घट झाली आहे.
“आम्हाला आमच्या खर्चाचे प्रमाण कमी करावे लागेल. येत्या काही महिन्यात कंपनीच्या कमाईत घट होणार आहे. बुकमायशो कंपनीत भारतासह जगभरात 1 हजार 450 कर्मचारी काम करतात. त्यापैकी वेगवेगळ्या टीम आणि इतर कामे करणाऱ्यांपैकी साधारण 270 कर्मचाऱ्यांना याचा फटका बसला आहे,' असे बुकमायशोचे मुख्य कार्यकारी आशिष हेमराजानी यांनी कर्मचार्‍यांना ईमेलद्वारे सांगितले.
मात्र, या कर्मचाऱ्यांच्या हिताची काळजी घेण्याचाही तितकाच प्रयत्न कंपनीने केला आहे. त्यांना काही प्रमाणात आर्थिक पाठबळ, आरोग्य विमा, इतर ठिकाणी रोजगाराची संधी देण्याचाही प्रयत्न केला आहे, असे ते म्हणाले.
कंपनीच्या नेतृत्वात असलेल्या ज्या टीम्सनी स्वतःहून मागे थांबण्याच्या निर्णय घेतला आहे, त्यांनी स्वतःहून त्यांच्या वेतनातील 10 ते 50 टक्क्यांपर्यंत कपात केली आहे. तसेच, त्यांचे भत्ते, जादा वेतन आणि वेतनवाढही कंपनीला दिली आहे.
कंपनीने खर्चात कपात केली आहे. तसेच, खर्च वाचवण्यासाठी या सर्व मार्गांचा वापर केल्यानंतर कंपनीचे सेवा विक्रेते, भागीदार, जागांचे मालक यांच्याशी पुन्हा वाटाघाटींची चर्चा सुरू केली आहे. शेवटचा उपाय म्हणून हा निर्णय घेण्यात आला आहे. कारण, लॉकडाऊन होणे ही एखाद्याच्या कामगिरी किंवा कार्यक्षमतेमुळे घडलेली बाब नाही.
कोविड-19 या महामारीमुळे लागू केलेल्या लॉकडाऊनमुळे मल्टिप्लेक्स चित्रपटगृहे, नाट्यगृहे, खेळांची मैदाने बंद आहेत आणि लोक घरातच राहात आहेत. यामुळे या प्रकारच्या सेवा आणि त्यांच्याशी जोडलेल्या पूरक सेवांवर परिणाम झाला आहे.
