आग्रा - समाजवादी पार्टीचे खासदार आझम खान यांनी संसदेच्या कार्यकारी अध्यक्षा रमा देवी यांच्याबद्दल केलेल्या वादग्रस्त विधानाचा भाजप युवा मोर्चाच्या कार्यकर्त्यांनी जोरदार निषेध केला. आग्रामध्ये युवा मोर्चाच्या कार्यकर्त्यांनी आझम खान यांच्या पुतळ्याचे दहन केले. तसेच भाजयुमो उपाध्यक्ष बंटी बघेलने आजम खान यांचे डोळे काढणाऱ्यांना १ लाखांचे बक्षीस जाहीर केले आहे.
संसदेमध्ये आजम खान यांनी केलेल्या वादग्रस्त विधानानंतर त्यांच्यावर समाजमाध्यमातून जोरदार टीका होताना दिसत आहे. आग्र्याचे उपमुख्यमंत्री दिनेश शर्मा यांनी आजम खान यांना अटक करण्याची मागणी केली. यापुढे जर आजम खान यांनी असे वक्तव्य केले तर त्यांना मारहाण करण्याची भाषा भाजयुमोचे नितेश शिवहरे यांनी केली. यावेळी भाजप युवा मोर्चाच्या कार्यकर्त्यांनी आजम खान यांच्या विरोधात जोरदार घोषणाबाजी केली.
