ठाणे - भिवंडी तालुका पोलीस ठाण्याच्या हद्दीतील सोनाळे येथे खून झाल्याची घटना घडली होती. मुंबई महापालिकेच्या पाईपलाईन रोडवर २५ वर्षीय वयोगटातील अनोळखी महिलेची आठ दिवसांपूर्वी तीक्ष्ण हत्याराने हात, पाय व मुंडके छाटून निर्वस्त्र मृतदेह प्लास्टिकच्या ड्रममध्ये कोंबून फेकून दिला होता. तर हात, पाय व मुंडके प्लास्टिकमध्ये गुंडाळून हे अवयव ताडाळी (फेणापाडा ) येथील एका नाल्यात फेकून दिल्याची घटना घडली होती.
विशेष म्हणजे प्लास्टिक ड्रम हा तारापूर येथील केमिकल कंपनीतून भिवंडीतील एका डाईंगमध्ये आणण्यात आला होता. तो एका कामगाराने नेवून त्याची विक्री भंगारवाल्याला केली होती. त्याच्याकडून ड्रम आरोपी हमीद याने खरेदी केला होता. त्या ड्रममध्ये पत्नीची हत्या केलेला मृतदेह कोंबून तो भाड्याने टेंपो खरेदी करून त्यावाटे मृतदेह फेकून दिला होता. सदरचा ड्रमचा प्रवास सीसीटीव्ही कॅमेऱ्यात कैद झाला होता. त्याचा आधार घेऊन पोलिसांनी महिलेच्या खूनाचा उलगडा केला आहे. पतीने चारित्र्याच्या संशयावरून केल्याचे पोलीस तपासात उघड झाले आहे. सायरा हमीद सरदार (२७ रा. बबिताची खोळी ,देवजीनगर ) असे निर्घृण खून झालेल्या महिलेचे नांव आहे. सदर महिलेची हत्या तिचा पती हमीद मदरअली सरदार (२७ ) यानेच केल्याचे पोलीस तपासात उघड झाले आहे.
सरदार दांपत्य मूळचे पश्चिम बंगालचे रहिवाशी असून ते भिवंडीतील देवजीनगर येथे वास्तव्यास होते. हमीद हा नेहमीच पत्नीच्या चारित्र्यावर संशय घेऊन तिला मारहाण करीत असे.पती हमीद हा कामावर निघून गेल्यानंतर ती घरातून निघून जात असे, त्यामुळे तिला वारंवार समजावून देखील ती ऐकत नसल्याने संतापलेल्या हमीद याने तिचा कोयत्याने गळा, उजवा हात व दोन पाय गुडघ्यापासून कापून ते भाड्याच्या टेंपोद्वारे फेणापाडा येथील पाईपलाईनच्या नाल्यात तर धड प्लास्टिकच्या ड्रममध्ये भरून तो सोनाळे हद्दीत फेकून दिले होते. विशेष म्हणजे मृत महिलेची ओळख पटू नये यासाठी मारेकरी पती हमीद याने निर्वस्त्र मृतदेह एका प्लास्टिकच्या ड्रममध्ये भरून तो सोनाळे गांवच्या हद्दीतील मुंबई महापालिकेच्या पाईपलाईन लगत असलेल्या सह्याद्री रेडिमिक्स प्लांटच्या समोर फेकून दिला होता.
या खूनाचा तपास करण्यासाठी पोलिसांपुढे ठोस पुरावा नसताना मृतदेह कोंबलेला प्लास्टिक ड्रमचा आधार घेऊन वरिष्ठ पोलीस निरीक्षक संजय हजारे यांच्या मार्गदर्शनाखाली पंकज घाटकर ,पोलीस हवालदार अनिल महाजन ,कैलास वाढविंदे ,जयेश मुकादम आदींच्या पोलीस पथकाने त्या आधारे खूनी पती हमीद मदरअली सरदर यास ताब्यात घेऊन अटक केली आहे. त्याला न्यायालयाने २६ एप्रिलपर्यंत पोलीस कोठडी सुनावली.
