हैदराबाद - पंजाब नॅशनल बँकेचे १३ हजार ७५८ कोटींचे कर्ज बुडवणाऱ्या नीरव मोदीला लंडन येथे अटक झाली. मात्र, त्याने अटकेपासून वाचण्यासाठी मोठी शक्कल लढवली होती. लपण्यासाठी त्याने देशभरातील अनेक देश पालथे घातले. एवढेच नाही तर त्याने आपला वेष बदलण्याचाही प्रयत्न केला होता. परंतु, हे सर्व करूनही अटकेपासून वाचण्यास तो अपयशी ठरला.
हिरे व्यापारी निरव मोदी १५ महिन्याआधी भारतातून फरार झाला होता. त्याने भारतीय तपास यंत्रणेपासून वाचण्यासाठी अनेक प्रयत्न केले. त्यासाठी त्याने वॅनुआटू या देशाचे नागरिकत्व घेण्याचा प्रयत्न केला होता. वॅनुआटू हा ऑस्ट्रेलिया खंडातील छोटा देश आहे. सिंगापूर येथेही स्थाही नागरिकत्व मिळवण्यासाठी त्याने निवेदन केले होते. त्यासाठी त्याने ब्रिटनमधील मोठ-मोठ्या कायदे तज्ज्ञांची मदत घेतली होती. एवढेच नाही तर आपली वेषभूशा बदण्यासाठी प्लास्टिक सर्जरी करण्याचेही त्याने ठरवले होते. मात्र, एवढे करूनही त्याला लंडन येथून अटक झाली.
नीरव मोदीने फरार झाल्यानंतर भारतीय यंत्रणेला चकवा देण्याचा प्रयत्न केला होता. असे असतानाही तो तपास यंत्रणेच्या रडारवर होता. त्याच्या आर्थिक व्यवहारांवरही यंत्रणेची करडी नजर होती. नीरव विविध देशांच्या यात्रा करत आहे, असेही यंत्रणेला माहिती होते. मात्र, या महिन्याच्या सुरूवातीला लंडन येथील एका पत्रकाराने त्याचा व्हिडिओ जारी केला होता. त्यानंतर त्याच्यावरील प्रत्यार्पणाच्या कारवाईला गती आली.
नीरव मोदी सध्या गंभीर संकटात आहे. त्याच्या विरोधात भारतीय यंत्रणेकडे ठोस पुरावे आहेत. त्यामुळे जगभरातल्या कोणत्याही न्यायालयामध्ये तो वाचू शकत नाही. अटक झाल्यानंतर त्याला २९ मार्चपर्यंत तुरुंगात डांबण्यात आले आहे. लवकरच त्याला भारतात आणले जाण्याची शक्यता आहे.
