नवी दिल्ली - इंदिरा गांधी आंतरराष्ट्रीय विमानतळावर सीमा शुल्क विभागाने सोने तस्करी करणाऱ्या टोळीच्या १ जणास अटक केली आहे. या आरोपी जवळ ७२ लाखाचे सोने सापडले आहे.
सीमा शुल्क विभागाचे अतिरिक्त आयुक्त डॉ. अमरदीप सिंह यांनी सांगितले, की विमान क्रमांक एआय-९१६ दुबई वरुन इंदिरा गांधी आंतरराष्ट्रीय विमानतळावरील टर्मिनल ३ वर आले. यावेळी ग्रीन चॅनलमध्ये तपासणीदरम्यान एका व्यक्तीबाबत संशय आला. त्यामुळे त्याला तपासणीसाठी नेण्यात आले. त्याच्या बॅगची तपासणी केली असता त्यात लोखडांच्या एका पार्टमध्ये सोन्याचा रोड लपवण्यात आला होता. या सोन्याचे वजन २ किलो ३१४ ग्रॅम असून भारतीय बाजारपेठेत याची किंमत ७२ लाख ५० हजार रुपये आहे.
'या' अगोदरही सापडला आहे हाच आरोपी
अतिरिक्त आयुक्तांनी सांगितले, की अटक करण्यात आलेला आरोपी २८ वर्षाचा असून तो हरियाणा राज्यात राहणारा आहे. या अगोदरही त्याला हैदराबादमधील राजीव गांधी विमानतळावर सोन्याची तस्करी करताना पकडण्यात आले होते. आतापर्यंत या आरोपीकडून १ कोटी ४५ लाखाचे सोने जप्त करण्यात आले आहे. सीमा शुल्कच्या अधिकाऱ्यांनी या आरोपीला अटक केली आहे. त्याची चौकशी सुरू असून या पाठिमागे कोण मास्टरमाईंड आहे, याचा तपास पोलीस करत आहे.
