नवी दिल्ली - केंद्रीय गृहमंत्री अमित शाह यांनी पंतप्रधान नरेंद्र मोदी यांना जम्मू काश्मीरमधील स्थितीमध्ये करण्यात येणाऱ्या सुरक्षेच्या उपाययोजनांची माहिती दिली. गेल्या काही दिवसांपासून जम्मू काश्मीरमध्ये परप्रांतीय नागरिकांवरील दहशतवादी हल्ल्यांचे प्रमाण वाढले आहे.
केंद्रीय गृहमंत्री अमित शाह यांनी केंद्रीय तपास संस्था, राज्यांचे पोलीस महासंचालक आणि गृहमंत्रालयातील वरिष्ठ अधिकाऱ्यांची सोमवारी बैठक घेतली. त्यानंतर गृहमंत्र्यांनी दुसऱ्याच दिवशी जम्मू आणि काश्मीरमधील सुरक्षेविषयी पंतप्रधानांना माहिती दिली.
हेही वाचा-शिवसेनेची वाटचाल काँग्रेस, राष्ट्रवादीच्या विचारांच्या दिशेने - देवेंद्र फडणवीस
गेल्या 18 दिवसांमध्ये दहशतवादी संघटनांकडून 11 नागरिकांची हत्या करण्यात आली आहे. केंद्रशासित प्रदेशांमध्ये करण्यात येणाऱ्या सुरक्षेच्या उपाय योजनांची माहिती केंद्रीय गृहमंत्री अमित शाह यांनी पंतप्रधानांना दिली. सध्याच्या हिंसाचारावर कडक कारवाई करण्याची शाह यांनी सुरक्षा संस्थांना सूचना दिली आहे.
हेही वाचा-देवेंद्र फडणवीसांच्या नेतृत्वात साखर कारखानदारांनी अमित शाह यांची घेतली भेट
अमित शाह करणार जम्मू काश्मीरचा दौरा
शाह हे 23 ते 25 ऑक्टोबर दरम्यान जम्मू आणि काश्मीरच्या तीन दिवसीय दौऱ्यावर जाणार आहेत. जम्मू काश्मीरच्या प्रशासनातील वरिष्ठ अधिकारी, पोलीस अधिकारी आणि सेंट्रल पॅरामिलिट्री फोर्सेसच्या वरिष्ठ अधिकारी यांची बैठक घेणार आहेत. जम्मू काश्मीरचे 370 वे कलम रद्द केल्यानंतर अमित शाह हे पहिल्यांदाच दौरा करणार आहेत. दौऱ्यात शाह यांच्याकडून विविध विकास प्रकल्पांची घोषणा होण्याची शक्यता आहे. दहशतवादी हल्ल्याच्या पार्श्वभूमीवर जम्मू आणि काश्मीरमध्ये हाय अलर्ट जारी करण्यात आला आहे.
हेही वाचा-'या' हत्येमागे कोणाचा हात ? काँग्रेसकडून निहंग प्रमुखाचा भाजपच्या वरिष्ठ नेत्यांसोबतचा फोटो व्हायरल
दरम्यान, जम्मू काश्मीरमध्ये परप्रांतीय नागरिकांवर दहशतवादी हल्ले वाढल्याने स्थलांतरित मजुरांमध्ये भीतीचे वातावरण आहे.
