महाराष्ट्रात तुटवडा तर गुजरातेत भाजपकडून रेमडेसिवीरचे निःशुल्क वाटप

सुरतमधील उधाना परिसरात असलेल्या भाजपच्या कार्यालयाबाहेर कोरोनाबाधितांच्या नातेवाईकांनी रांगा लावल्या आहेत. कोरोनाबाधितांना रेमडेसिवीर मिळत नसल्याने रुग्णांच्या नातेवाईकांना अडचणींना सामोरे जावे लागत आहे. त्यामुळे शहरातील सिव्हिल रुग्णालयाबाहेरही रुग्णांच्या नातेवाईक रांगेत उभे राहून रेमडेसिवीर मिळण्याची प्रतिक्षा करत आहेत.

अहमदाबाद- गेली पाच दिवस सुरतमध्ये रेमडेसिवीर इंजेक्शनचा तुटवडा निर्माण झाला आहे. अशा परिस्थितीत सुरतमधील भाजप कार्यालयाकडून रेमडेसिवीरचे मोफत वाटप करण्यात येत आहे. ही इंजेक्शन घेण्यासाठी कोरोनाबाधितांच्या नातेवाईकांनी लांबलचक रांग लावली आहे. ही रांग थेट अर्धा किलोमीटरपर्यंत गेली आहे.

सुरतमधील उधाना परिसरात असलेल्या भाजपच्या कार्यालयाबाहेर कोरोनाबाधितांच्या नातेवाईकांनी रांगा लावल्या आहेत. कोरोनाबाधितांना रेमडेसिवीर मिळत नसल्याने रुग्णांच्या नातेवाईकांना अडचणींना सामोरे जावे लागत आहे. त्यामुळे शहरातील सिव्हिल रुग्णालयाबाहेरही रुग्णांच्या नातेवाईक रांगेत उभे राहून रेमडेसिवीर मिळण्याची प्रतिक्षा करत आहेत.

हेही वाचा-रेमडेसिवीरच्या काळ्या बाजाराचा पर्दाफाश; दोघांना अटक, 272 इंजेक्शन जप्त

गुजरातचे मुख्यमंत्री विजय रुपाणी यांनी गुजरातला 3 लाख इंजेक्शन मिळणार असल्याचे जाहीर केले आहे. तर गुजरात भाजपचे अध्यक्ष सी. आर. पाटील यांनी रुग्णालयाबाहेर भाजपचे कार्यकर्त्यांकडून गरजुंना मोफत इंजेक्शन देणार असल्याचे जाहीर केले आहे. या घोषणेनंतर भाजप कार्यालयाबाहेर कोरोनाबाधितांच्या नातेवाईकांनी सकाळपासून एकच गर्दी केल्याचे दिसून आले आहे.

हेही वाचा-रेमडेसिवीरचे उत्पादन वाढवा, एप्रिल अखेर दिवसाला दीड लाख इंजेक्शन लागण्याची शक्यता - राजेश टोपे

सुरत येथील भाजपचे खासदार दर्शना जर्दोश म्हणाल्या की, गृह विलगीकरणात असलेल्यांसाठी आणि डॉक्टरांनी चिठ्ठी दिलेल्यांसाठी ही व्यवस्था आहे. सध्या सुमारे 1 हजार इंजेक्शनचे वितरण करण्यात आले आहे. इतरांना टोकन दिले असल्याने त्यांना उद्या इंजेक्शन मिळू शकणार आहे. सुरत भाजप अध्यक्ष निरंजन जनझमेरा हे ईटीव्ही भारतशी बोलताना म्हणाले की, सी. आर. पाटील यांनी 5 हजार इंजेक्शनच्या ऑर्डर दिल्या आहेत. आधार कार्ड आणि डॉक्टरांची चिठ्ठी दाखविल्यानंतर गरजुंना एक इंजेक्शन देण्यात येत असल्याची त्यांनी माहिती दिली.

भाजपकडून रेमडेसिवीरचे निःशुल्क वाटप

एफडीएच्या नियमांचे उल्लंघन करून हे इंजेक्शन वाटप

गुजरात आपचे प्रवक्ते योगेश जाघवानी म्हणाले की, प्रशासनाकडून अद्याप सरकारी रुग्णालयांना इंजेक्शन मिळाले नाही. सरकारच्या यंत्रणेपेक्षा वरचढ होत भाजपने ५ हजार इंजेक्शन वाटप करण्याचे जाहीर केले. प्रशासन अपयशी ठरले तर भाजप कार्यालयाला इंजेक्शन मिळाले आहेत. यामधून विसंगती दिसून येत आहे. एफडीएच्या नियमांचे उल्लंघन करून हे इंजेक्शन वाटप करण्यात येत आहे. एवढ्या संख्येने भाजप अध्यक्षांकडे इंजेक्शन कसे आले, त्यांना परवाना कोणी दिला याची चौकशी करण्याची गरज आहे. सी. आर. पाटील हे पक्षाचा प्रचार करण्यासाठी इंजेक्शन वाटप करत आहेत. पण, महामारीत असे खालच्या स्तरावरील राजकारण करू नये, असे त्यांनी आवाहन केले आहे. काँग्रेसचे नेते अनुप राजपूत म्हणाले की, ५ हजारांचा साठा भाजप अध्यक्षाकडे कसा आला याची चौकशी करण्याची गरज आहे.

महाराष्ट्रात रेमेडेसिवीरचा तुटवडा

राज्यातील कोरोनाचा उद्रेक वाढत असताना यावरील उपचारासाठी वापरल्या जाणाऱ्या रेमडेसिवीर इंजेक्शच्या तुटवड्याच्याही बातम्या समोर येत आहेत. रेमडेसिवीर कोरोनावर उपचारांसाठी वापरले जात असले तरी याची मूळ निर्मिती ही कावीळवर उपचारांसाठी करण्यात आली होती. मात्र 2014 मध्ये हे औषध इबोलावर गुणकारी असल्याचे दिसून आले होते.

भारतात चार कंपन्यांचे रेमडेसिवीर उपलब्ध

भारतात झायडस कॅडिला, हेटेरो लॅब्स, डॉ. रेड्डी आणि सिपला या कंपन्यांना रेमडेसिवीरच्या उत्पादनास मंजुरी मिळालेली आहे. यापैकी झायडस कॅडिलाचे रेमडेसिवीर इंजेक्शन रेमडॅक या नावाने, हेटेरो लॅब्सचे कोविफोर या नावाने, डॉ. रेड्डीचे रेडीक्स या नावाने तर सिपलाचे सिप्रेमी या नावाने उपलब्ध आहे.