आग्रा : लंडनच्या एका कोर्टाने मूळचे आग्र्याचे रहिवासी मानसोपचारतज्ज्ञ डॉ. कबीर गर्ग यांना सहा वर्षांच्या तुरुंगवासाची शिक्षा सुनावली आहे. त्यांच्यावर ते डार्क वेब ब्राउझरवर चालणाऱ्या बाल लैंगिक शोषण साइटचे नियंत्रक असल्याचा आरोप होता. हा आरोप सिद्ध झाल्याने त्यांना शिक्षा सुनावण्यात आली आहे.
लैंगिक शोषणाशी संबंधित फोटो आणि व्हिडिओ सापडले : नॅशनल क्राइम एजन्सी डार्क वेब ब्राउझरवर चालवल्या जाणार्‍या बाल लैंगिक शोषणाशी संबंधित साइट 'द एनेक्स'ची चौकशी करत होती. त्याचे जगभरात 90 हजारांहून अधिक सदस्य आहेत. वेबसाइटवर बाल लैंगिक शोषणाशी संबंधित चित्रे आणि व्हिडिओ शेअर करण्यात आले होते. तपासानंतर नोव्हेंबर 2022 मध्ये दक्षिण लंडनमधील त्यांच्या फ्लॅटवर छापा टाकण्यात आला. तेथे पथकाला एक लॅपटॉप सापडला. यामध्ये बाल लैंगिक शोषणाशी संबंधित 7000 हून अधिक फोटो आणि व्हिडिओ होते.
जप्त केलेल्या लॅपटॉपमध्ये सापडले अनेक लेख : डॉ. कबीर गर्ग यांच्या जप्त केलेल्या लॅपटॉपमध्ये त्यांनी लिहिलेल्या बाल लैंगिक शोषणाशी संबंधित अनेक लेखही सापडले आहेत. मुलांच्या मनावर आणि मेंदूवर लैंगिक शोषणाचा काय परिणाम होतो, याची त्यांना चांगली माहिती असल्याचे तपास यंत्रणेने म्हटले आहे. तपासात 'यौवन आणि किशोरवयीन लैंगिकता', 'भारतातील बाल शोषणावरील अभ्यास' आणि 'बलात्काराचे परिणाम' यांसारखे शीर्षक असलेले लेखही सापडले होते. जानेवारी 2023 मध्ये डॉ. कबीर गर्ग यांनी कोर्टात स्वत:ला दोषी मानलं होतं.
आठ गुन्ह्यांमध्ये दोषी : डॉ. कबीर यांना लैंगिक गुन्हेगार म्हणून दोषी ठरवल्यानंतर गंभीर हानी प्रतिबंधक आदेशानुसार सहा वर्षांच्या तुरुंगवासाची शिक्षा सुनावण्यात आली आहे. लहान मुलांच्या लैंगिक शोषणाला प्रोत्साहन देणे, बाल पोर्नोग्राफी बनवणे आणि वितरित करणे व निषिद्ध प्रतिमा ठेवणे अशा आठ गुन्ह्यांमध्ये ते दोषी आढळले आहेत.
पत्नीने छळाचा आरोप केला होता : डॉ. कबीर गर्ग यांनी 2016 मध्ये आग्रा येथील महिला डॉक्टरशी लग्न केले. त्यानंतर 2018 मध्ये ते पत्नीला घेऊन लंडनला गेले. ते दक्षिण पूर्व लंडनमध्ये वैद्यकीय सराव करत होते. 2019 मध्ये त्यांच्या पत्नीने त्यांच्यावर छळाचा आरोप केला होता. त्यानंतर ते दोघे वेगळे झाले. डॉ. कबीर गर्ग यांचे वडील आग्रा येथील प्रख्यात मानसोपचार तज्ज्ञ आहेत.
हेही वाचा :
