വീട്ടുമുറ്റത്തെ കിണറ്റില്‍ വീണ പുലിയെ രക്ഷപ്പെടുത്തി

വയനാട്: വയനാട്ടിലെ വൈത്തിരിയിൽ കിണറ്റിൽ വീണ പുലിയെ മണിക്കൂറുകൾ നീണ്ട ശ്രമത്തിനൊടുവിൽ രക്ഷപ്പെടുത്തി. വൈത്തിരി വട്ടവയൽ സ്വദേശി ഗോപിയുടെ വീട്ടിന് മുന്നിലെ കിണറ്റില്‍ രാത്രി പന്ത്രണ്ടരയോടെയാണ് പുള്ളിപുലി വീണത്. രാവിലെ ശബ്ദം കേട്ട് വീട്ടുകാർ ചെന്നു നോക്കിയപ്പോഴാണ് പുലിയെ കിണറ്റില്‍ കണ്ടത്. തുടർന്ന് വനം വകുപ്പ് അധികൃതരെ വിവരമറിയിച്ചു. ഏഴരയോടെ തുടങ്ങിയ രക്ഷാപ്രവർത്തനം നാല് മണിക്കൂർ നീണ്ടുനിന്നു. വലയിൽ കുരുക്കിയ പുലിയെ വെടിവച്ചു മയക്കിയശേഷമാണ് പുറത്തെത്തിച്ചത്. വിവരമറിഞ്ഞ് നൂറുകണക്കിനാളുകളാണ് പുലിയെ കാണാൻ പ്രദേശത്തെത്തിയത്.