ലോകത്ത് വ്യാപകമായി പടര്‍ന്നുപിടിച്ച കൊവിഡ് മഹാമാരിയാണ് കഴിഞ്ഞ രണ്ട് വർഷത്തോളമായി നമ്മുടെ ജീവിതത്തിന്‍റെ പലമേഖലയേയും നിയന്ത്രിക്കുന്നത്. വൈറസില്‍ നിന്ന് അടിക്കടി രൂപമാറ്റം സംഭവിക്കുന്ന പുതിയ വകഭേദങ്ങള്‍, പല സ്ഥാപനങ്ങളേയും അവയുടെ പൂര്‍ണമായ പ്രവര്‍ത്തനങ്ങള്‍ പുനരാരംഭിക്കുന്നതിനും വെല്ലുവിളിയാണുയര്‍ത്തുന്നത്. നിലവിലെ സാഹചര്യങ്ങള്‍ക്ക് സ്ഥാപനങ്ങള്‍ നടപ്പിലാക്കിയ മാനദണ്ഡങ്ങള്‍ അനുസരിച്ച് പ്രവര്‍ത്തിക്കുക എന്നതാണ് ഏറ്റവും മികച്ച തീരുമാനം. അതിനാല്‍ തന്നെ നിലവില്‍ ഹൈബ്രിഡ് തൊഴില്‍ അന്തരീക്ഷം സാധാരണമായി മാറിയിട്ടുണ്ട്.
ഓൺലൈനില്‍ ജോലികള്‍ ചെയ്യുന്നത് പല തരത്തിൽ നമ്മുടെ സമ്മര്‍ദം വർദ്ധിപ്പിക്കുകയാണ് ചെയ്യുന്നത്. നാം ചെയ്യുന്ന ജോലിയ്ക്ക് ഏറ്റവും മികച്ച ഫലം കൊണ്ടുവരാന്‍ നമ്മുടെ ആരോഗ്യത്തിലും ശ്രദ്ധ കേന്ദ്രീകരിക്കേണ്ടത് പ്രധാനമാണ്. വീട്ടിൽ ഇരുന്നോ ഓഫിസിൽ നിന്നോ ജോലി ചെയ്യുമ്പോൾ ആരോഗ്യം നിലനിർത്താനുള്ള ചില പൊടിക്കൈകള്‍ നോക്കാം :
അടിക്കടി വെള്ളം കുടിക്കുക
ശരീരത്തിലെ ജലാംശത്തിന്‍റെ അളവ് കൃത്യമായി നിലനിര്‍ത്തേണ്ടത് ഇതില്‍ ഒരു പ്രധാന ഘടകമാണ്. ജോലിയുടെ സമ്മര്‍ദം മൂലം ഉണ്ടാകുന്ന ക്ഷീണം ഒഴിവാക്കുന്നതിന് ഇടയ്ക്കിടയ്ക്ക് വെള്ളം കുടിച്ച് ശരീരത്തിലെ ജലാംശത്തിന്‍റെ അളവ് നിലനിര്‍ത്തേണ്ടത് ആവശ്യമാണ്. അതിന് വേണ്ടി ജോലിസമയത്ത് കൈയില്‍ ഒരുകുപ്പി വെള്ളം കരുതുകയും അത് ഇടവേളകളില്‍ കുടിക്കുകയും ചെയ്യുന്ന ശീലം നല്ലതാണ്. അതില്‍ തേങ്ങാവെള്ളം, മോര്, നാരങ്ങാവെള്ളം, ഇൻഫ്യൂസ്ഡ്, ഡീടോക്സ് വെള്ളം തുടങ്ങിയ ആരോഗ്യകരമായ മറ്റ് ദ്രാവകങ്ങളും ഉള്‍പ്പെടുത്താൻ ശ്രമിക്കാം. ഫോണില്‍ കുടിവെള്ള അലാറം സജ്ജീകരിച്ച് ഇത് മറന്ന് പോകാതെ കൃത്യമായി പാലിക്കാനും ശ്രമിക്കാം.
പോഷകഗുണമുള്ള ആഹാരം കഴിക്കുക
ഭക്ഷണം ഒഴിവാക്കുന്നത് ശരീരത്തിന് അങ്ങേയറ്റം ഹാനികരവും ഗുരുതരമായ ആരോഗ്യ പ്രശ്നങ്ങൾക്ക് കാരണമാവുകയും ചെയ്യും. ജോലി ചെയ്യുന്ന സമയങ്ങളില്‍ നമ്മൾ ലഘുഭക്ഷണങ്ങൾ കഴിക്കാറുണ്ട്. അതോടൊപ്പം തന്നെ കൃത്യമായ സമയങ്ങളില്‍ പ്രഭാതഭക്ഷണവും, ഉച്ചഭക്ഷണവും, അത്താഴവും കഴിക്കേണ്ടതും പ്രധാനമാണ്. പ്രോട്ടീനുകൾ, കാർബോഹൈഡ്രേറ്റുകൾ, നാരുകൾ, മറ്റ് പോഷകങ്ങൾ എന്നിവ അടങ്ങിയ ഭക്ഷണം നിങ്ങളെ ദിവസം മുഴുവൻ ഊർജസ്വലമാക്കി നിര്‍ത്തുകയും ശരീരവണ്ണം, ഗ്യാസ്ട്രിക് ആക്രമണം, ക്ഷീണം തുടങ്ങിയ പ്രശ്നങ്ങളിൽ നിന്ന് രക്ഷിക്കുകയും ചെയ്യും.
ലഘുഭക്ഷണങ്ങള്‍ കഴിക്കുക
പോഷകസമൃദ്ധമായ ഭക്ഷണം കഴിക്കുന്നത് പോലെ തന്നെ വിശപ്പകറ്റാൻ ഇടയ്‌ക്കിടെ ലഘുഭക്ഷണം കഴിക്കേണ്ടതും ആവശ്യമാണ്. വറുത്ത മഖാന, വറുത്ത നിലക്കടല, പഴങ്ങൾ, മധുരമില്ലാത്ത നട്ട് ബട്ടറുകല്‍, പ്രോട്ടീൻ ബാറുകൾ, മറ്റ് ആരോഗ്യകരമായ ലഘുഭക്ഷണങ്ങൾ പോലുള്ള ആരോഗ്യകരമായ വസ്‌തുക്കള്‍ നിങ്ങൾ എപ്പോഴും കൈവശം വയ്‌ക്കണം. അവയ്‌ക്കൊപ്പം തന്നെ അനോരാഗ്യകരമായ ഭക്ഷണപദാര്‍ത്ഥങ്ങള്‍ ഒഴിവാക്കാനും ശ്രദ്ധിക്കണം.
ശ്വസന വ്യായാമങ്ങൾ
ശ്വസന വ്യായാമങ്ങൾക്ക് നിങ്ങളെ ശാന്തമാക്കാനും മനസിന്‍റെ ഏകാഗ്രത വര്‍ധിപ്പിക്കാനും കഴിയുമെന്നത് എല്ലാവര്‍ക്കും അറിയുന്ന കാര്യമാണ്. ശ്വസന വ്യായാമങ്ങൾ നിങ്ങളുടെ രക്തത്തിലെ ഓക്സിജന്റെ ഒഴുക്ക് വർദ്ധിപ്പിക്കുകയും ശരീരത്തില്‍ ഊർജം ഉത്‌പാദിപ്പിക്കുകയും ചെയ്യുന്നു. ആഴത്തിലുള്ള ശ്വാസോച്ഛ്വാസം സമ്മർദം കുറയ്ക്കുന്നതിനും സഹായിക്കും. ഇത്തരം വ്യായാമങ്ങൾ ശീലമാക്കുന്നതിലൂടെ നിങ്ങളുടെ തലച്ചോറിന് എല്ലാ സമ്മര്‍ദങ്ങളേയും പോസിറ്റീവ് മാനസികാവസ്ഥയോടെ ഏറ്റെടുക്കാൻ കഴിയും. അതോടൊപ്പം തന്നെ ഒരിടത്ത് കൂടുതല്‍ സമയം ഇരിക്കുന്നത് നടുവേദനയ്ക്കും കാൽമുട്ട് സന്ധികളിൽ വേദനയ്ക്കും കാരണമാകാന്‍ സാധ്യയുണ്ട്. ഇത് ഒഴിവാക്കുന്നതിന് ഓരോ 30 മിനിറ്റും 60 മിനിറ്റും കഴിയുംതോറും ഇരിപ്പിടത്തില്‍ നിന്ന് എഴുന്നേറ്റ് സ്ട്രെച്ചിങ് ചെയ്യുന്നത് അനുയോജ്യമാണ്. ഇത്തരത്തിലുള്ള സ്ട്രെച്ചിങ് ശരീരത്തില്‍ രക്തയോട്ടം നിലനിര്‍ത്തുകയും ഊര്‍ജസ്വലത നിലനിര്‍ത്തുകയും ചെയ്യും.
കമ്പ്യൂട്ടർ ഗ്ലാസുകൾ ധരിക്കുക
വര്‍ക്ക് ഫ്രം ഹോം ജോലികള്‍ വര്‍ധിച്ചതോടെ ഏകദേശം 18 മണിക്കൂർ വരെയാണ് ഓരോരുത്തരും കമ്പ്യൂട്ടര്‍ സ്ക്രീനിന് മുന്‍പില്‍ സമയം ചെലവഴിക്കുന്നത്. നീണ്ട നേരം ഇത്തരത്തില്‍ കമ്പ്യൂട്ടര്‍ സ്ക്രീനിന് മുന്‍പില്‍ സമയം ചെലവഴിക്കുന്നത് കണ്ണുകളില്‍ ഇടയ്ക്കിടയ്ക്ക് നനവ് അനുഭവപ്പെടുന്നതിനും ചുവപ്പ് നിറം ഉണ്ടാകുന്നതിനും വഴിയൊരുക്കും. അത് കൂടാതെ കാഴ്‌ച ശക്‌തിയേയും അപകടകരമായാണ് സ്‌ക്രീനില്‍ നിന്നുള്ള വെളിച്ചം ബാധിക്കുക. ഇത്തരം പ്രശ്നങ്ങള്‍ ഒഴിവാക്കുന്നതിന് കമ്പ്യൂട്ടർ ഗ്ലാസുകൾ ധരിക്കുകയും കൃത്യമായ മുന്‍കരുതലുകള്‍ സ്വീകരിക്കുകയും വേണം.
