വാഷിങ്‌ടണ്‍: രക്തസമ്മര്‍ദത്തെ കരുതി ഉപ്പ് ഉപയോഗിക്കാത്തവരാണോ? എന്നാല്‍ ഉപ്പ് പൂര്‍ണമായും ഒഴിവാക്കുന്നതും അത്ര നല്ലതല്ല. ഭക്ഷണത്തില്‍ ഉപയോഗിക്കുന്ന ഉപ്പ് ഹൃദയാഘാതം, സ്ട്രോക്ക്, ഹൃദയസംബന്ധമായ രോഗങ്ങളെ തുടര്‍ന്നുള്ള മരണം എന്നിവയില്‍ നിന്ന് തടയുമെന്ന് പഠനഫലങ്ങള്‍ പുറത്ത്. ലഭ്യമായ തെളിവുകളുടെയും ശേഖരിച്ച ഡാറ്റകളുടെയും അടിസ്ഥാനത്തില്‍ 'ഹാർട്ട് ജേണലാണ്' ഈ കണ്ടെത്തലുകൾ ഓണ്‍ലൈനില്‍ പ്രസിദ്ധീകരിച്ചത്. ഈ പഠനഫലം ലോകമെമ്പാടുമുള്ള ആളുകള്‍ക്ക് ഉപകാരപ്രദമാകുമെന്നും പഠനം പറയുന്നു.
ലോകമെമ്പാടും മരണത്തിനുള്ള പ്രധാന കാരണം ഹൃദയസംബന്ധമായ അസുഖങ്ങളാണ്. മാത്രമല്ല ഉയര്‍ന്ന രക്തസമ്മര്‍ദവും നേരത്തെയുള്ള മരണത്തിന് കാരണമാകുന്നുണ്ട്. ലോകത്തുള്ള 1.28 ബില്യൺ ആളുകൾക്ക് ഉയർന്ന രക്തസമ്മർദമുണ്ടെന്നും ഇതിൽ പകുതിയിലധികം പേരും രോഗനിർണയം നടത്തിയിട്ടില്ലെന്നും ഗവേഷകർ അടിവരയിടുന്നു. അതേസമയം, സോഡിയം കൂടുതലുള്ളതും പൊട്ടാസ്യം കുറവുള്ളതുമായ ഭക്ഷണക്രമമാണ് രക്തസമ്മർദം വർധിപ്പിക്കുന്നതിനുള്ള ഒരു കാരണം. എന്നാല്‍ ഇത് അധികമാരും തിരിച്ചറിയാറില്ല.
ഭക്ഷണത്തിലെ പൊട്ടാസ്യം ക്ലോറൈഡ് (KCl)ന്‍റെ അനുപാതം ഉപ്പ് എന്ന് നാം സാധാരണമായി വിളിക്കാറുള്ള സോഡിയം ക്ലോറൈഡ് (NaCl) കൊണ്ട് മറികടക്കുന്നതോടെ രക്തസമ്മർദം കുറയ്‌ക്കാൻ സഹായിക്കുന്നുവെന്നാണ് പഠനം പറയുന്നത്. ചൈനയിൽ അടുത്തിടെ പ്രസിദ്ധീകരിച്ച സാൾട്ട് സബ്‌സിറ്റിറ്റ്യൂട്ട് ആൻഡ് സ്ട്രോക്ക് സ്‌റ്റഡി (SSaSS) എന്ന വലിയ പഠനവും പറഞ്ഞുവെക്കുന്നത് ഉപ്പിന്‍റെ ഉപയോഗം ഹൃദയാഘാതം, സ്ട്രോക്ക്, നേരത്തെയുള്ള മരണം എന്നിവയ്‌ക്കുള്ള സാധ്യത കുറയ്‌ക്കുമെന്നാണ്. എന്നാല്‍ ഇത് ലോകത്തിന്‍റെ മറ്റ് ഭാഗങ്ങളിൽ ബാധകമാകുമോ എന്ന് പഠനം വ്യക്തമാക്കുന്നില്ല.
Also Read: 'നല്ല സമ്മര്‍ദമാണോ? അത് തലച്ചോറിന് ഗുണം ചെയ്യും'; പുതിയ പഠനഫലങ്ങള്‍ പുറത്ത്
എംഎംഎച്ച്‌ജിയിൽ അളക്കുന്ന രക്തസമ്മർദത്തിന്‍റെ സംഖ്യാഫലം പ്രധാനമായും രണ്ട് രീതിയിലാണ് പറയാറുള്ളത്. ഹൃദയം ശരീരത്തില്‍ രക്തം പമ്പ് ചെയ്യുന്ന ശക്തിയെ സൂചിപ്പിക്കുന്ന ഉയർന്ന സംഖ്യയായ സിസ്‌റ്റോളിക്കിലും, ഹൃദയത്തിൽ രക്തം നിറയുമ്പോൾ ധമനികളിലുണ്ടാകുന്ന മര്‍ദത്തെ സൂചിപ്പിക്കുന്ന താഴ്‌ന്ന സംഖ്യയായ ഡയസ്‌റ്റോളിക്കിലും. ഇത്തരത്തില്‍ 2021 ഓഗസ്‌റ്റ് അവസാനം വരെ പലഭാഗങ്ങളിലായി ക്ലിനിക്കൽ ട്രയലുകൾ നടത്തി ഗവേഷണ ഡാറ്റാബേസുകൾ പരിശോധിച്ചാണ് രക്തസമ്മർദം, ഹൃദ്രോഗം, നേരത്തെയുള്ള മരണം എന്നിവയില്‍ ഉപ്പ് എങ്ങിനെ പങ്കുവഹിക്കുന്നുവെന്ന് കണ്ടെത്തലില്‍ സംഘം എത്തിച്ചേരുന്നത്.
ഇതിനായി യൂറോപ്പ്, പടിഞ്ഞാറൻ പസഫിക് മേഖല, അമേരിക്ക, തെക്ക് കിഴക്കൻ ഏഷ്യ എന്നിവിടങ്ങളിലെ 30,000 ത്തോളം ആളുകളില്‍ 21 പ്രധാന അന്താരാഷ്‌ട്ര ക്ലിനിക്കൽ പരീക്ഷണങ്ങളുടെ ഫലങ്ങളാണ് ഗവേഷണ സംഘം ശേഖരിച്ചത്. പഠന കാലയളവ് ഒരു മാസത്തില്‍ തുടങ്ങി അഞ്ച് വർഷം വരെ നീണ്ടുനിന്നു. ഉപ്പുള്ള പദാര്‍ഥങ്ങളില്‍ സോഡിയം ക്ലോറൈഡിന്‍റെ അനുപാതം 33 ശതമാനത്തില്‍ നിന്ന് 75 ശതമാനം വരെയും പൊട്ടാസ്യത്തിന്‍റെ അനുപാതം 25 ശതമാനത്തില്‍ നിന്ന് 65 ശതമാനം വരെയും വ്യത്യാസപ്പെടുന്നതായി പഠനത്തില്‍ കണ്ടെത്തി. മാത്രമല്ല, ശേഖരിച്ച ഡാറ്റ വിശകലനം ചെയ്‌തപ്പോള്‍ ഉപ്പ് അടങ്ങിയ പദാര്‍ഥങ്ങള്‍ പങ്കെടുത്ത എല്ലാവരിലും രക്തസമ്മർദം കുറയ്‌ക്കുന്നതായി കാണിച്ചു. ഇത് ആകെ മൊത്തത്തില്‍ സിസ്‌റ്റോളിക് രക്തസമ്മർദത്തില്‍ 4.61 mm Hg കുറവും, ഡയസ്‌റ്റോളിക് രക്തസമ്മർദത്തില്‍ 1.61 mmHg കുറവും രേഖപ്പെടുത്തിയതായും പഠനം വ്യക്തമാക്കി.
Also Read: അപകടത്തിൽ ഓർമ നഷ്‌ടപ്പെട്ടു, തലയോട്ടി ശീതീകരിച്ച് ഓർമ തിരികെ നൽകി ഡോക്‌ടർമാർ
അതേസമയം, ഭൂമിശാസ്‌ത്രപരമായ വ്യത്യാസങ്ങള്‍, പ്രായം, ലിംഗഭേദം, മുമ്പ് തന്നെയുള്ള ഉയർന്ന രക്തസമ്മർദം, വ്യക്തിയുടെ ഭാരം, അടിസ്ഥാന രക്തസമ്മർദം, മൂത്രത്തിൽ സോഡിയം പൊട്ടാസ്യം എന്നിവയുടെ അടിസ്ഥാന അളവ് എന്നിവ പരിഗണിക്കാതെ എല്ലാവരിലും രക്തസമ്മർദത്തിന്‍റെ കുറവ് സ്ഥിരതയുള്ളതായും പഠനത്തില്‍ കണ്ടെത്തി. 24,000 ത്തിലധികം പേർ പങ്കെടുത്ത ഇതിലെ അഞ്ച് പരീക്ഷണഫലങ്ങളുടെ സംയോജിത ഡാറ്റ വിശകലനത്തിന്‍റെ അടിസ്ഥാനത്തില്‍ തന്നെ ഉപ്പ് അടങ്ങിയ ഭക്ഷണ പദാര്‍ഥങ്ങള്‍ ഉപയോഗിക്കുന്നവരില്‍ ഏതെങ്കിലും കാരണത്താലുള്ള അകാല മരണത്തിനുള്ള സാധ്യത 11 ശതമാനവും, ഹൃദയ സംബന്ധമായ അസുഖങ്ങളിൽ നിന്നും അല്ലെങ്കിൽ ഹൃദയാഘാത സാധ്യത 13 ശതമാനവും, സ്‌ട്രോക്കിനുള്ള സാധ്യത 11 ശതമാനവും കുറഞ്ഞതായും പഠനഫലങ്ങള്‍ സൂചിപ്പിക്കുന്നു.
എന്നാല്‍ പൂള്‍ ചെയ്‌ത ഡാറ്റ വിശകലനത്തിനിടെ പഠനങ്ങളുടെ രൂപകൽപ്പനയിൽ വ്യത്യാസങ്ങള്‍ വന്നുവെന്നും, ഉയർന്ന രക്തസമ്മർദമില്ലാത്ത ആളുകളുടെ കുറച്ച് ഡാറ്റ മാത്രമേ പഠനവിധേയമാക്കിയുള്ളു എന്ന ചില കണ്ടെത്തലിലെ പരിമിതികൾ ഗവേഷകര്‍ തന്നെ തുറന്ന് സമ്മതിക്കുന്നു. മാത്രമല്ല, ഭക്ഷണത്തിലെ ഉയർന്ന പൊട്ടാസ്യത്തിന്‍റെ അളവ് ആരോഗ്യത്തിന് ഹാനികരമാണെന്നതിന് തെളിവുകളൊന്നുമില്ല എന്നും സംഘം തന്നെ വിലയിരുത്തുന്നുണ്ട്.
Also Read: നവദമ്പതികള്‍ക്ക് വെഡ്ഡിങ് കിറ്റുമായി ഒഡിഷ സർക്കാർ, ലക്ഷ്യം കുടുംബാസൂത്രണം പഠിപ്പിക്കല്‍
