ഉറക്കമില്ലായ്മ പല ശാരീരിക മാനസിക പ്രശ്‌നങ്ങളും ഉണ്ടാക്കുന്നു. ഉറക്കം ശരിയായി കിട്ടിയില്ലെങ്കില്‍ കണ്ണുകള്‍ വരണ്ടിരിക്കുകയും അവയില്‍ ചൊറിച്ചല്‍ ഉണ്ടാകുകയും ചെയ്യും. ദീര്‍ഘകാലമായുള്ള ഉറക്കമില്ലായ്മ കണ്ണുകള്‍ക്ക് പല രോഗങ്ങള്‍ ഉണ്ടാകാനുള്ള സാധ്യത വര്‍ധിപ്പിക്കുന്നു.
കണ്ണിന്‍റെ സുതാര്യമായ പടലമായ കോര്‍ണിയ കണ്ണിന്‍റെ ആരോഗ്യം സംരക്ഷിക്കുന്നതിലും അതിന്‍റെ പ്രവര്‍ത്തനത്തിലും നിര്‍ണായക പങ്കാണ് വഹിക്കുന്നത്. മൂല കോശങ്ങളാണ് കോര്‍ണിയയെ സംരക്ഷിക്കുന്നത്. ഈ മൂല കോശങ്ങള്‍ വിഭജിച്ചുകൊണ്ടാണ് നശിച്ചുകൊണ്ടിരിക്കുന്ന കോശങ്ങള്‍ക്ക് പകരമാവുന്നത്. കണ്ണുകളിലെ ചെറിയ മുറിവുകള്‍ പരിഹരിക്കുന്നതും ഈ മൂല കോശങ്ങള്‍ വിഭജിച്ചുകൊണ്ടാണ്.
അതുകൊണ്ട് തന്നെ കോര്‍ണിയയുടെ മൂലകോശത്തിന്‍റെ പ്രവര്‍ത്തനം ശരിയായി നടക്കേണ്ടത് കണ്ണുകളുടെ ആരോഗ്യ സംരക്ഷണത്തിന് അത്യാന്താപേക്ഷിതമാണ്. കോര്‍ണിയ മൂല കോശത്തിന്‍റെ പ്രവര്‍ത്തനങ്ങള്‍ അവതാളത്തിലാകുമ്പോള്‍ കാഴ്ച കുറവ് അടക്കമുള്ള കണ്ണ് രോഗങ്ങള്‍ ഉണ്ടാകുന്നു. ചൈനയിലെ സിയാമെന്‍ സര്‍വകലാശാലയിലേയും യുഎസിലെ ഹാര്‍വേര്‍ഡ് സര്‍വകലാശാലയിലേയും ഗവേഷകര്‍ സംയുക്തമായി നടത്തിയ പഠനം ഉറക്കകുറവ് കോര്‍ണിയ മൂല കോശങ്ങളെ എങ്ങനെ ബാധിക്കുന്നു എന്നതിനെ പറ്റിയാണ്.
'സ്‌റ്റമ് സെല്‍റിപ്പോര്‍ട്ട്സ്' എന്ന ശാസ്ത്ര ജേര്‍ണലിലാണ് ഈ പഠനം പ്രസിദ്ധീകരിച്ചത്. എലികളിലാണ് പഠനനം നടത്തിയത്. പഠനത്തില്‍ കണ്ടെത്തിയത് ചെറിയ കാലയളവിലെ ഉറക്കമില്ലായ്മ കോര്‍ണിയയിലെ മൂല കോശം വിഭജിക്കുന്നതിന്‍റെ നിരക്ക് വര്‍ധിപ്പിക്കുന്നു എന്നാണ്. അതേസമയം ഉറക്കമില്ലായ്മ കോര്‍ണിയയിലെ പ്രൊട്ടക്റ്റീവ് ടിയര്‍ ഫിലിമിന്‍റെ ഘടന മാറ്റുന്നു എന്നും കണ്ടെത്തി.
ദീര്‍ഘ കാലയളവിലുള്ള ഉറക്കമില്ലായ്മ കോര്‍ണിയയുടെ ആരോഗ്യത്തിന് ഗുരുതരമായ പ്രശ്നങ്ങള്‍ വരുത്തിവയ്‌ക്കുന്നതായും കണ്ടെത്തി. കോര്‍ണിയയുടെ സാന്ദ്രത കുറയുക, ചുളിയുക തുടങ്ങിയ തുടങ്ങിയ പ്രശ്നങ്ങളാണ് ഇതുമൂലം ഉണ്ടാകുന്നത്. മൂല കോശങ്ങളുടെ എണ്ണം കുറയുന്നതായും കണ്ടെത്തി. മൂല കോശങ്ങള്‍ നശിക്കുന്നതുകൊണ്ട് തന്നെ കാഴ്ച കുറവ് ഉണ്ടാകാനുള്ള സാധ്യതയാണ് വര്‍ധിക്കുന്നത്.
എലികളില്‍ നടത്തിയ പഠനത്തിന്‍റെ പശ്ചാത്തലത്തില്‍ മനുഷ്യരില്‍ ഇത് എങ്ങനെ ബാധിക്കുന്നു എന്നുള്ളതിനെപറ്റി കൂടുതല്‍ പഠനം നടത്തണം. ആന്‍റി ഓക്സിഡന്‍റ് ചികിത്സ ഉറക്കകുറവ് കൊണ്ട് ഉണ്ടാകുന്ന കോര്‍ണിയയിലെ പ്രശ്നങ്ങള്‍ പരിഹരിക്കാന്‍ സാധിക്കുമോ എന്നുള്ളതിനെ കുറിച്ചും പരിശോധിക്കേണ്ടതുണ്ട്.
ഉറക്കകുറവ് പരിഹരിക്കുന്നതിന് സഹായിക്കുന്ന ആറ് ഭക്ഷണയിനങ്ങള്‍
ചൂട് പാല്‍: ഉറങ്ങാന്‍ കിടക്കുന്നതിന് മുമ്പ് ചൂട് പാല്‍ കുടിക്കുന്നത് ഉറക്കം ലഭിക്കാന്‍ സാഹായിക്കുന്നു. ഇതിന് കാരണം ട്രിപ്പ്ടുഫാന്‍, കാല്‍സ്യം, മെലാടോണിന്‍, വിറ്റാമിന്‍ ഡി. ഈ നാല് ഘടകങ്ങളും ഉറക്കം വര്‍ധിപ്പിക്കാന്‍ സഹയിക്കുന്നവയാണ്.
അണ്ടിപരിപ്പുകള്‍: വിവിധ തരത്തിലുള്ള അണ്ടിപരിപ്പുകളില്‍ മഗ്‌നീഷ്യം ട്രൈപ്ടോഫാന്‍, മെലാടോണിന്‍ എന്നിവയടങ്ങിയിട്ടുണ്ട്. ഈ ഘടകങ്ങള്‍ ഉറക്കമില്ലായ്മ പരിഹരിക്കാന്‍ സഹായിക്കുമെന്ന് പഠനത്തില്‍ കണ്ടെത്തിയിട്ടുണ്ട്.
ജമന്തിപൂവ് ചായ: ജമന്തിപൂവ് ചായ സമ്മര്‍ദ്ദവും ഉല്‍ക്കണ്‌ഠയും കുറയ്ക്കാന്‍ സഹായിക്കും. അതുകൊണ്ട് തന്നെ ഉറക്കത്തേയും സഹായിക്കും. ഇതിലെ ഫ്ലാവനോയിഡ്‌സും, അപിജെനിന്‍, ആന്‍റിഓക്സിഡന്‍റ് എന്നിവ ഉറക്കമില്ലായ്മ പരിഹരിക്കുന്നു.
കിവി: വിറ്റാമിന്‍ സി അടങ്ങിയ കിവിയില്‍ ധാരളം മൂലകങ്ങള്‍ അടങ്ങിയിട്ടുണ്ട്. കിവിയില്‍ ആന്‍റിഓക്സിഡന്‍റും, മെഗ്നിഷ്യവും അടങ്ങിയിട്ടുണ്ട്. ഇവ ഉറക്കം ലഭിക്കാന്‍ സഹായിക്കുന്നു
ടര്‍ക്കി കോഴിയിറച്ചി: ടര്‍ക്കി കോഴിയിറച്ചിയില്‍ അടങ്ങിയ പ്രോട്ടീനും ട്രൈപ്ടോഫാനും ഉറക്കം ലഭിക്കാന്‍ സഹായിക്കുന്നു.
കൊഴുപ്പടങ്ങിയ മത്സ്യങ്ങള്‍: അയല, ചെമ്പല്ലി തുടങ്ങിയ മത്സ്യങ്ങല്‍ ഉറക്കം ലഭിക്കാന്‍ നല്ലതാണ്. ഈ മത്സ്യങ്ങള്‍ സെറൊടോണിന്‍ നിയന്ത്രിച്ച് നിര്‍ത്താന്‍ സഹായിക്കുന്നു. വിറ്റാമിന്‍ ഡി, ഒമേഗ-3 ഫാറ്റി ആസിഡ് എന്നിവ ഇവയില്‍ അടങ്ങിയിട്ടുണ്ട്.
ALSO READ: ചൂടില്‍ നിന്ന് കണ്ണുകളെ എങ്ങനെ സംരക്ഷിക്കാം; ചില മാര്‍ഗങ്ങള്‍
