കൊവിഡ് വന്നോ... എങ്കില്‍ ശ്രദ്ധിക്കണം ഹൃദയത്തെ

കൊവിഡ് ബാധിതരിൽ ഹൃദയ സംബന്ധമായ രോഗങ്ങൾ കൂടുന്നുവെന്ന് പഠനം.

കൊവിഡ് മൂന്നാം തരംഗം കുറഞ്ഞു വരുമ്പോഴും കൊവിഡ് ബാധിതരായതിന് ശേഷം ആളുകളിൽ കണ്ടുവരുന്ന രോഗങ്ങളെ കുറിച്ചുള്ള പഠനം തുടരുകയാണ്. ശ്വാസകോശം, തലച്ചോറ് എന്നീ അവയവങ്ങളെ ഉൾപ്പടെ കൊവിഡ് സാരമായി ബാധിച്ചുവെന്നാണ് വിവിധ പഠനങ്ങൾ പറയുന്നത്. കൊവിഡിന് ശേഷം ഹൃദയ സംബന്ധമായ രോഗങ്ങളും മരണവും കൂടുന്നുവെന്നാണ് പുറത്ത് വരുന്ന പുതിയ പഠനം.

ഹൃദയ സംബന്ധമായ അസുഖങ്ങൾ വരാൻ സാധ്യതയുള്ളവരിൽ രോഗങ്ങൾ കൂടുതലായി റിപ്പോർട്ട് ചെയ്യുന്നുവെന്നും ഹൃദയരോഗബാധിതരാകാൻ സാധ്യതയില്ലാത്തവരിലും ഹൃദ്‌രോഗങ്ങൾ കൊവിഡിന് ശേഷം കണ്ടുവരുന്നുവെന്നുമാണ് പഠനം പറയുന്നത്. നേച്ചർ മെഡിസിൻ ജേണലിലാണ് ഇത് സംബന്ധിക്കുന്ന പഠനം പ്രസിദ്ധീകരിച്ചത്. കൊവിഡിനെ തുടർന്ന് യുഎസിൽ മൂന്ന് മില്യൺ ആളുകളിൽ ഹൃദയ സംബന്ധരോഗങ്ങളും മരണവും റിപ്പോർട്ട് ചെയ്‌തെന്ന് പഠനം അവകാശപ്പെടുന്നു.

ഹൃദയ സംബന്ധമായ അസുഖങ്ങൾ വർധിക്കുന്നു

ഹൃദയ സംബന്ധമായ അസുഖങ്ങൾ ഇല്ലാതിരുന്നവരിൽ കൊവിഡ് രോഗം ബാധിച്ച 72 ശതമാനം പേർക്കും കൊറോണറി ആർട്ടറി രോഗങ്ങളും, 63 ശതമാനം പേരിൽ ഹൃദയാഘാതവും 52 ശതമാനം പേരിൽ സ്‌ട്രോക്കും റിപ്പോർട്ട് ചെയ്‌തെന്നാണ് പഠനം പറയുന്നത്. കൊവിഡ് ബാധിതരായതിന് ശേഷം കാർഡിയോവാസ്‌കുലാർ രോഗങ്ങളും തുടർന്ന് മരണത്തിനും കാരണമായെന്ന് പഠനം ചൂണ്ടിക്കാട്ടി.

ജീവിതശൈലിയിൽ മാറ്റം വരുത്തണം

മറ്റ് അസുഖങ്ങളിൽ നിന്ന് വ്യത്യസ്‌തമായി ഹൃദയത്തിനെ ബാധിക്കുന്ന രോഗങ്ങൾ പെട്ടെന്ന് പരിഹരിക്കപ്പെടുന്നില്ല. ജീവിതകാലം മുഴുവൻ രോഗബാധിതരായി തുടരേണ്ട സാഹചര്യം ഇതിലൂടെ സൃഷ്‌ടിക്കപ്പെടുന്നുവെന്ന് വാഷിങ്ടൺ യൂണിവേഴ്‌സിറ്റി മെഡിസിൻ അസിസ്റ്റന്‍റ് ഫ്രൊഫസർ സിയാജ്‌ അൽ അലി അഭിപ്രായപ്പെട്ടു. ആഗോളതലത്തിൽ കൊവിഡിന്‍റെ ആരംഭഘട്ടം മുതൽ 380 മില്യൺ ആളുകളാണ് രോഗബാധിതരായത്. കൊവിഡ് രോഗബാധിതരായതിന് ശേഷം ഹൃദയത്തിന്‍റെ സംരക്ഷണം ഉറപ്പുവരുത്തുന്ന ജീവിതശൈലി പിന്തുടരേണ്ടത് ഓരോരുത്തരുടെയും ഉത്തരവാദിത്തമാണെന്നും ഫ്രൊഫസർ പറയുന്നു.

കൊവിഡിനെ തുടർന്ന് ലോകത്ത് 15 മില്യൺ പേരിൽ ഹൃദയ സംബന്ധമായ രോഗങ്ങൾ റിപ്പോർട്ട് ചെയ്‌തെന്നും പഠനത്തിൽ വ്യക്തമാക്കുന്നുണ്ട്. 2020 മാർച്ച് ഒന്ന് മുതൽ 2021 ജനുവരി 15 വരെ കൊവിഡ് ബാധിതരായവരിൽ 153,760 പേരെയാണ് പഠനത്തിന് വിധേയമാക്കിയത്. കൊവിഡ് വാക്‌സിനേഷൻ സ്വീകരിക്കേണ്ടതിന്‍റെ ആവശ്യകതയും പഠനം പറഞ്ഞുവെക്കുന്നു.