രാഹുല്‍ നാളെ കേരളത്തില്‍: ഒപ്പം പ്രിയങ്കയും

രാഹുലിനൊപ്പം പ്രിയങ്കാ ഗാന്ധിയും വയനാടെത്തും. റോഡ്ഷോയിലും പത്രികാ സമര്‍പ്പണത്തിലും പ്രിയങ്കാ ഗാന്ധി രാഹുലിനെ അനുഗമിക്കും.

ലോക്സഭാ തെരഞ്ഞെടുപ്പില്‍ വയനാട്ടില്‍ നിന്നും മത്സരിക്കുന്ന കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി നാളെ കേരളത്തിലെത്തും. വ്യാഴാഴ്ചയാണ് നാമനിര്‍ദ്ദേശപത്രിക സമര്‍പ്പിക്കുന്നത്. നാളെ രാത്രി കോഴിക്കോട് എത്തുന്ന രാഹുല്‍ ഹെലികോപ്റ്ററിലാണ് കല്‍പ്പറ്റയിലെത്തുക. റോഡ് മാര്‍ഗം വയനാട്ടിലെത്താനുള്ള സാധ്യതയും ഉദ്യോഗസ്ഥര്‍ പരിശോധിക്കുന്നുണ്ട്. റോഡ്ഷോയ്ക്ക് ശേഷം ഉച്ചക്ക് 12 മണിയോടെ രാഹുല്‍ പത്രിക സമര്‍പ്പിക്കും.

റോഡ്ഷോയിലും നാമനിര്‍ദ്ദേശപത്രിക സമര്‍പ്പണത്തിനും കോണ്‍ഗ്രസ് ജനറല്‍ സെക്രട്ടറി പ്രിയങ്കാ ഗാന്ധി രാഹുലിനെ അനുഗമിക്കും. സംഘടനാ ചുമതലയുള്ള ജനറല്‍ സെക്രട്ടറി കെസി വേണുഗോപാലും രാഹുലിന് ഒപ്പമുണ്ടാകും. രാഹുലിന്‍റെ സുരക്ഷാ ചുമതലയുള്ള എസ്പിജി സംഘം വയനാടെത്തി സുരക്ഷാ സാഹചര്യങ്ങള്‍ വിലയിരുത്തി. മാവോയിസ്റ്റ് സാന്നിധ്യമുള്ള ജില്ലയായതിനാല്‍ സംസ്ഥാന പൊലീസും ജാഗ്രതയിലാണ്.

വയനാട്ടിലെ തെരഞ്ഞെടുപ്പ് പോരാട്ടം ദേശീയ ശ്രദ്ധയിലെത്തിച്ച കോണ്‍ഗ്രസ് അധ്യക്ഷനെ സ്വീകരിക്കാനുള്ള ഒരുക്കങ്ങള്‍ പൂര്‍ത്തിയാക്കിയിരിക്കുകയാണ് കോണ്‍ഗ്രസ് പ്രവര്‍ത്തകര്‍. രാഹുലിന്‍റെ വരവ് വിജയ സാധ്യത ഒട്ടും കുറയ്ക്കില്ലെന്നാണ് മണ്ഡലത്തിലെ എല്‍ഡിഎഫ്, എന്‍ഡിഎ സ്ഥാനാര്‍ഥികളുടെ നിലപാട്.