വയനാട്: പുത്തുമലയിൽ നിന്ന് ഇന്ന് കണ്ടെടുത്ത മൃതദേഹത്തിന്‍റെ ഡിഎൻഎ പരിശോധന നടത്താൻ തീരുമാനിച്ചു. ഇന്ന് കണ്ടെത്തിയ മൃതദേഹം കാണാതായ ഗൗരീശങ്കറിന്‍റേത് ആണെന്ന് ബന്ധുക്കള്‍ സംശയം ഉന്നയിച്ചതോടെയാണ് പരിശോധന നടത്താന്‍ തീരുമാനമെടുത്തത്.
ഉരുള്‍പൊട്ടല്‍ നടന്ന പ്രദേശത്തിന് മൂന്ന് കിലോമീറ്റര്‍ അകലെ ഏലവയലില്‍ നിന്ന് ഇന്ന് കണ്ടെത്തിയ മൃതദേഹം പുത്തുമല സ്വദേശി അണ്ണയ്യന്‍റേതാണെന്ന് ബന്ധുക്കൾ സ്ഥിരീകരിച്ചിരുന്നു. സംസ്കാര ചടങ്ങുകൾ നടക്കുന്നതിനിടെയാണ് മൃതദേഹം ഗൗരീശങ്കറിന്‍റേത് ആണെന്ന് ബന്ധുക്കൾ സംശയം ഉന്നയിക്കുന്നത്. തുടർന്ന് മൃതദേഹം സംസ്കരിക്കുന്നത് മാറ്റിവയ്ക്കുകയായിരുന്നു.
ഡിഎന്‍എ പരിശോധന നടത്താൻ കാണാതായ മുഴുവന്‍പേരുടേയും ബന്ധുക്കളുടെ രക്ത സാമ്പിൾ ശേഖരിച്ചിട്ടുണ്ട്. തിരുവനന്തപുരത്താണ് പരിശോധന നടത്തുന്നത്. മൂന്ന് ദിവസത്തിനകം പരിശോധനാഫലം കിട്ടുമെന്നാണ് പ്രതീക്ഷിക്കുന്നത്
