വയനാട്: സിസ്റ്റര്‍ ലൂസി കളപ്പുരക്ക് നീതി ലഭ്യമാക്കണമെന്ന് ആവശ്യപ്പെട്ട് വിശ്വാസി സമൂഹം പ്രതിഷേധത്തിനൊരുങ്ങുന്നു. ബുധനാഴ്‌ച മാനന്തവാടിയില്‍ ഐക്യദാര്‍ഢ്യ സദസും റാലിയും സംഘടിപ്പിക്കുമെന്ന് കാത്തലിക് ലെമെന്‍സ് അസോസിയേഷന്‍ വാര്‍ത്താ സമ്മേളനത്തില്‍ അറിയിച്ചു. സഭാ നടപടികള്‍ അവസാനിപ്പിച്ച് സിസ്റ്റര്‍ക്ക് നീതി ലഭ്യമാക്കുക, എഫ്സിസി സഭാംഗമായ സിസ്റ്റർ ലൂസി കളപ്പുരയെ പുറത്താക്കാൻ നോട്ടീസ് നൽകിയ സുപ്പീരിയർ ജനറലിന്റെ നടപടി പിന്‍വലിക്കുക എന്നീ ആവശ്യങ്ങള്‍ ഉന്നയിച്ചാണ് പ്രതിഷേധം.
മാധ്യമപ്രവര്‍ത്തകരെ ചേര്‍ത്ത് സിസ്റ്റര്‍ ലൂസിക്കെതിരെ സമൂഹമാധ്യമങ്ങളില്‍ അപവാദ പ്രചരണം നടത്തിയ വൈദികനെതിരെ നടപടിയെടുക്കണം. വിഷയത്തിൽ മാനന്തവാടി രൂപത ബിഷപ് മറുപടി പറയണം. കന്യാസ്ത്രീകളുടെ ദുരൂഹ മരണവുമായി ബന്ധപ്പെട്ട കേസുകളില്‍ പുനരന്വേഷണം നടത്തണം. കന്യാസ്ത്രീ മഠങ്ങളുടെ സംരക്ഷണത്തിന് സര്‍ക്കാര്‍ നിയമം കൊണ്ടുവരണമെന്നും കാത്തലിക് ലെമെൻസ് അസോസിയേഷൻ ആവശ്യപ്പെട്ടു.
