തൃശൂര്‍: കൊരട്ടി വെട്ടുകടവിൽ എംഡിഎംഎയുമായി ഷോര്‍ട്‌ഫിലിം നടൻ ഉൾപ്പെടെ രണ്ടുപേര്‍ അറസ്‌റ്റിൽ. കൊരട്ടി പൊലീസിന്‍റെ വാഹന പരിശോധനയ്‌ക്കിടെയാണ് പ്രതികള്‍ പിടിയിലായത്. ഇന്നലെ രാത്രിയായിരുന്നു സംഭവം.
തൃശൂര്‍ കോടാലി സ്വദേശി അരുൺ, മറ്റത്തൂര്‍ സ്വദേശി നിഖിൽ എന്നിവരാണ് എംഡിഎംഎയുമായി അറസ്റ്റിലായത്. കൊരട്ടി എസ്‌എച്ച്‌ഒ ബി.കെ. അരുണിന് ലഭിച്ച രഹസ്യ വിവരത്തിന്‍റെ അടിസ്ഥാനത്തിൽ കൊരട്ടി വെട്ട്‌കടവ് പാലത്തിലായിരുന്നു പരിശോധന. എട്ട് ഗ്രാമോളം എംഡിഎംഎ ഇവരില്‍ നിന്നും കണ്ടെടുത്തു.
ഇവർ വന്ന വാഹനം പരിശോധിക്കുന്നതിനിടയിൽ സംശയം തോന്നിയ പൊലീസ് ദേഹപരിശോധന നടത്തിയപ്പോഴാണ് മയക്കുമരുന്ന് പിടികൂടിയത്. വസ്ത്രത്തിനുള്ളിൽ ഒളിപ്പിച്ച നിലയിൽ ചെറിയ പ്ലാസ്‌റ്റിക് കവറുകളിലായാണ് ക്രിസ്റ്റല്‍ രൂപത്തിലുള്ള എംഡിഎംഎ കണ്ടെത്തിയത്. മയക്കുമരുന്നിന്‍റെ ഉറവിടം കണ്ടെത്താൻ പൊലീസ് അന്വേഷണം ആരംഭിച്ചു.
പ്രതികളുമായി ഇടപാട് നടത്തുന്നവരെ കുറിച്ചും പൊലീസ് അന്വേഷിക്കും.
