തൃശൂര്‍ : നടനും ബിജെപി നേതാവുമായ സുരേഷ് ഗോപിയുടെ മകളുടെ വിവാഹത്തില്‍ പങ്കെടുത്ത് പ്രധാനമന്ത്രി (PM Modi at Suresh Gopi's daughter's marriage). വിവാഹ ചടങ്ങില്‍ പങ്കെടുക്കാനായി നരേന്ദ്ര മോദി രാവിലെ 7.45ഓടെ ഗുരുവായൂരില്‍ എത്തിയിരുന്നു. ഗുരുവായൂര്‍ ശ്രീവത്സം ഗസ്റ്റ് ഹൗസില്‍ വിശ്രമിച്ച ശേഷമാണ് പ്രധാനമന്ത്രി വിവാഹ ചടങ്ങിനായി ക്ഷേത്രത്തില്‍ എത്തിയത്. ഇതിനിടെ മോദി ക്ഷേത്ര ദര്‍ശനവും നടത്തിയിരുന്നു.
ദര്‍ശനം പൂര്‍ത്തിയാക്കി ഗസ്റ്റ് ഹൗസിലെത്തി ദര്‍ശന സമയത്ത് ധരിച്ച വസ്‌ത്രം മാറിയാണ് പ്രധാനമന്ത്രി വിവാഹ ചടങ്ങിനെത്തിയത്. ഗുരുവായൂര്‍ ക്ഷേത്രത്തില്‍ ഇന്ന് രാവിലെ വിവാഹിതരായ മറ്റ് വധൂവരന്‍മാര്‍ക്കും പ്രധാനമന്ത്രി ആശംസകള്‍ അറിയിച്ചു. ക്ഷേത്രത്തില്‍ എത്തിയ നരേന്ദ്ര മോദി ഗുരുവായൂരപ്പന്‍റെ ദാരു ശിൽപം സമർപ്പിച്ചു. ശ്രീ കോവിലിന് ചുറ്റും പ്രദക്ഷിണം വച്ച് നമിച്ചു. തുടർന്ന് താമര മൊട്ടുകൾ കൊണ്ട് തുലാഭാരവും നടത്തി.
പ്രധാനമന്ത്രിയെ തന്ത്രി ചേന്നാസ് നമ്പൂതിരിപ്പാട്, ദേവസ്വം പ്രസിഡന്‍റ് പൊഫ.വിജയൻ എന്നിവർ ചേർന്നാണ് സ്വീകരിച്ചത്. കേരളീയ വേഷത്തിൽ ആയിരുന്നു പ്രധാനമന്ത്രിയുടെ ക്ഷേത്ര ദർശനം. ഒരു മണിക്കൂറോളം അദ്ദേഹം ഗുരുവായൂർ ക്ഷേത്രത്തിൽ ചെലവഴിച്ചു. പ്രധാനമന്ത്രിയുടെ സന്ദര്‍ശനത്തോടനുബന്ധിച്ച് കനത്ത സുരക്ഷയാണ് ക്ഷേത്ര പരിസരത്ത് ഏര്‍പ്പെടുത്തിയത്.
എറണാകുളത്ത് നിന്ന് ഹെലികോപ്‌റ്ററിലാണ് പ്രധാനമന്ത്രി ഗുരുവായൂരില്‍ എത്തിയത് (PM Modi at Thrissur). ശ്രീകൃഷ്‌ണ കോളജ് മൈതാനത്ത് ഇറങ്ങിയ പ്രധാനമന്ത്രിയെ കാണാനും അഭിവാദ്യം അര്‍പ്പിക്കാനും ആയിരക്കണക്കിന് ബിജെപി പ്രവര്‍ത്തകര്‍ തടിച്ചുകൂടിയിരുന്നു. മൈതാനത്ത് ബിജെപി സംസ്ഥാന ജില്ല നേതാക്കളും ചേര്‍ന്ന് സ്വീകരിച്ചു.
സുരേഷ് ഗോപിയുടെ മകള്‍ ഭാഗ്യ സുരേഷിന്‍റെ വിവാഹ ചടങ്ങിലായിരുന്നു പ്രധാനമന്ത്രിയുടെ സാന്നിധ്യം. ചടങ്ങിന് ശേഷം പ്രധാനമന്ത്രി തൃപ്രയാര്‍ ശ്രീരാമസ്വാമി ക്ഷേത്രത്തിലും ദര്‍ശനം നടത്തി. തൃപ്രയാർ തന്ത്രി തരണനല്ലൂരിന്‍റെ ക്ഷണമാണ് അദ്ദേഹത്തിൻ്റെ ക്ഷേത്ര ദർശനത്തിന് കാരണമായത്. അയോധ്യയിൽ പ്രാണ പ്രതിഷ്‌ഠ ചടങ്ങ് നടക്കുന്ന ഘട്ടത്തിൽ തൃപ്രയാർ ശ്രീരാമ ക്ഷേത്രത്തിൽ ദർശനം നടത്തുന്നത് ഉചിതമായിരിക്കുമെന്ന തന്ത്രിയുടെ കത്തും പ്രധാനമന്ത്രിയുടെ ക്ഷേത്ര ദർശനത്തിന് കാരണമായി.
ഉച്ചയ്‌ക്ക് മുന്‍പ് തന്നെ പ്രധാനമന്ത്രി കൊച്ചിയിലേക്ക് മടങ്ങും. വിവിധ പരിപാടികളില്‍ പങ്കെടുത്ത ശേഷം ഇന്ന് തന്നെ ഡല്‍ഹിയിലേക്ക് തിരിക്കും.
